لندن کې د افغانستان او انگلستان د تجارت د گډې خونې مشر ډاکټر فرید هوتک وايي چې د پنجشنبې په ورځ چې انگلستان کې خلکو کوم ریفرنډم یا نظر پوښتنه کې برخه واخیسته او سلو کې پنځوسو نه زیاتو د اروپايي اتحاد نه د انگلستان د وتلو په ملاتړ راېې ورکړه،اوس داسې ښکاري چې زیاتره په خپلې فیصلې باندې پښیمانه دي.
ډاکټر فرید هوتک د امریکا غږ آشنا راډیو سره مرکه کې ویلي چې داسې بریښي چې د انگلستان خلکو دا نه وه حس کړې چې دا فیصله به سمدستي داسې منفي اغیزې ولري، د پونډ قیمت به راټیټ شي، په تجارت او نړیوال بازار به تاثیر وکړي او اروپا سره به ېې اړیکې ضعیفې شي.
هغه دا هم وايي چې اوس د رسنیو د راپورونو نه داسې معلومیږي چې د انگلستان خلک د دې ریفرینډم د فیصلې مقابل کې پارلیمان او یا سترې محکمې ته ورشي او د بدلولو هڅه ېې وکړي.
