د ولسي جرګې راتلونکو ټاکنو ته د نوماندانو کمپاینونه په شدت روان دي. ځینې افغان ځوانان د نوماندانو رای ورکونې لپاره شرایط په ګوته کوي. دوي وايي د تېرو ټاکنو ترخه تجربه لري او دا وارې نه غواړي د دوي برخليک سره څوک بې پروايي وکړي. د امریکا غږ سره په خبرو کې دوی ځينې عمده شرطونه داسې وویل:
- د پارلمان وړتیا
ځينې ځوانان وايي هغه نوماند د وکالت وړ دی چې د دوی ستونزو ته غوږ ونیسي او د حوصلې خاوند اوسي. د دوی په وینا هغه نوماند ته رایه ورکړي چې د دې حوصله ولري چې یوه بې وزله افغان سره کېني او د هغه ستونزې واوري. دوی وايي په پارلمان کې د دوی ځینې پخواني استازي په خپلو کارونو بوخت دي او موکلینو ته وخت نه ورکوي. په ټوله کې دوی وایي چې په راتلونکې کې باید د خپلې رایې نه پښېمانه نشي.
- ميراثي قدرت
ځينې ځوانان په دې آند دي چې هغه نوماندانو ته به رایه ورنکړي چې پلرونه یا نږدې کسان یې په واک کې ښکېل دي. دوي وايي د یادو سیاستوالو کار همدا دی چې د خپلې څوکۍ ځای ناستی خپله ټاکي او د ملت په غم کې نه دي.
- خپلواکي
سیاسي احزابو سره د ځینو نوماندانو اړيکې هغه بل عامل دی چې ځينې ځوانان یې دې ته اړ کړي تر څو یادو کسانو ته د رایې ورکولو نه لاس په سر شي. دوی وايي د ځينو حزبونو د فعالیت نه ښې خاطرې نه لري او له همدې کبله د خپلواکو نوماندوا په هکله یې نظر تر ډېره مثبت دی.
- د ښار نظافت ته پاملرنه
تېره جمعه کله چې ټاکنیز کمپاینونه پیل شول ګڼو نوماندانو خپل عکسونه د ښار په لارو او سړکونو کې ځوړند کړل خو ځینو یې د عکسونو پاتې کاغدونه په لارو کې وغورځول چې د ښار چاپېریال پرې ککړ شو. دې کار په ټولنیزو رسنیو کې پراخ غبرګونونه درلودل. کابل ښاروالۍ وايي د سرغړونکو نوماندانو سره به قانوني چلند وکړي. اوس ځینې ځوانان وايي که یو نوماند سر له اوسه د ښار نظافت ته پام نه کوي نو د دوي ښه استازولي خو لا لرې خبره ده.
- نوی فکر
ولسی جرګې ته اکثره نوماندان ځوانان دي. د مدني فعالانو نه نیولې تر خبریالانو، ورزشکارانو، سوداګرو او ځینې نورې په زده کړو سمبالې ځوانې څېرې د خلکو استازولۍ ته ملا تړلې. که څه هم د دوی په منځ کې ځینې داسې ځوانان هم شته چې سیاسي تجربه نه لري خو بیا هم د ځینو ځوانانو هيله همدوی ته ده او په دې باور دي چې دوی ته رایه ورکول ښه کار دی.
ټاکل شوې چې روان کال په ۲۸ نېټه د افغانستان په ۳۳ ولایتونو کې د ولسي جرګې ټاکنې په لاره واچول شوي. په ولسي جرګې کې ۲۵۰ څوکۍ د ټولو ولایتونو نوماندانو ته ځانګړې شوي دي.
