د سولې د عالي شورا مرستیال حاجي دین محمد وايي زیات احتمال شته چې د افغان حکومت او طالبانو ترمنځ د سولې مذاکرات په قطر کې پیل شي.
افغان حکومت هم نن وویل چې کابل ته د زلمي خلیلزاد وروستي سفر په ترڅ کې د مذاکراتو په نیټې او ځای خبرې شوې دي.
د سولې د برخې دغه چارواکی وايي د پنځه زره طالب بندیانو خوشې کول د طالبانو د فشار نقطه ده، او په دې هڅه کې دي چې د خپلو جنګیالیو په خوشې کولو سره، د مذاکراتو لپاره جواز ترلاسه کړي.
حاجي دین محمد وايي کابل ته د پاکستان د پوځ د مشر وروستی سفر د سولې په برخه کې افغانستان ته په یو ډول د همکارۍ ډاډ ورکول وو.
د پاکستان د پوځ مشر جنرال قمر جاوید باجوه د سه شنبې په ورځ جون نهه (غبرګولي ۲۰) په نا اعلان شوي سفر کابل ته تللی وو، چې د خپل سفر په ترڅ کې یې ولسمشر غني او نورو افغان چارواکو سره کتلي وو.
له حاجي دین محمد سره د امریکا غږ د خبریال وحید فیضي مرکه دلته وګورئ:
