د آمازون شرکت د ۸۱۰ ملیارد ډالرو په ارزښت د اسهامو په درلودلو سره د نړۍ تر ټولو لوړ ارزښت لرونکی شرکت وګڼل شو.
تر آمازون وړاندې د مایکروسافټ شرکت دغه امتیاز خپل کړی و چې اوس د ۷۹۰ ملیارد ډالرو په درلودلو سره دویم ګڼل کیږي.
د سي ان ان خبري آژانس راپور ورکړی چې د آمازون شرکت د آنلاین پلور او تکنالوژۍ پر مټ وکولی شول چې د ۲۰۱۸ کال تر پایه پورې خپل عاید ۱۰ سلنه زیاد کړي.
همداراز د فوربس مجلې هم د آمازون د شرکت رئیس “جیفر بیزوس “د نړۍ تر ټولو مالداره کس معرفي کړی.
جیفر بیزوس د آمازون د شرکت د ۱۶ سلنه اسهامو مالک دی.
د اپل شرکت د ۲۰۱۸ کال تر نیمایي پورې ۱.۱ تریلیون ډالره اسهام درلودل او د جدول په سر کې و خو د کال په وروستیو میاشتو کې یې ۳۵ سلنه اسهام له لاسه ورکړل او څلورم مقام ته راټيټ شو.
اوس مهال د اپل د شرکت اسهام ۷۱۰ ملیارد ډالرو ته رسیږي.
دا مهال د نړۍ څلور تر ټولو ډیر ارزښت لرونکي شرکتونه په ترتیب سره، آمازون، مایکروسافټ، ګوګل او اپل دي.
