ددی موافقې د اجرا کېدو پیل یوه ورځ ترهغې وروسته کیږي چې ایران د متحده ایالاتو او فرانسې هغه ادعاوې ردې کړې چې ویلي وو په ایران کې ترسره شوي د اوږد واټن ویشتونکو توغندیو ازموینه د ملګروملتونو له پرېکړې سرغړونه ده.
ایران وایي د امنیت د شورا بندیزونه یوازې پر هغو توغندیو دی چې اتومي سرګلولې انتقالولی شي.
د شنبې په ورځ په تهران کې د ایران د بهرنیو چارو وزیرجواد ظریف وویل د ایران هیڅ یو توغندی د اتومي قابلیت لرلو لپاره ندی جوړ شوی.
هغه وايي " موږ ویلی شوو چې د ایران د توغندیو پروګرام یوازې د هیواد د ځمکنۍ بشپړتیا د ساتنې په هدف دی او د ملګرو ملتونو له پریکړو سره هیڅ ارتباط نلري."
د ښاغلي ظریف تر وینا یوه ورځ مخکې په ملګروملتونو کې د متحده ایالاتو سفیرې سمانتا پاور ویلي وو چې د ایران د منځني واټن ویشتونکی توغندی بلکل د اتومي سرګلولې د انتقال قابلیت لري او واشنګتن به یې په ځواب کې په امنیت شورا کې قانوني اقدام وکړي.
د شنبې په ورځ په تهران کې د ایراني سیال سره یوځای د جرمني د بهرنیو چارو وزیر فرنک والتر ستینمایرخبریالانو ته وویل چې په موافقه کې د ښکیلو غاړو ترمنځ باور باید ختم نشي او د ایران نه یی د پوره شفافیت څرګندولوغوښتنه وکړه.
ښاغلي ستینمایر وویل" زه همدومره مشوره ورکولې شم چې تر آخري ممکنه حده شفافیت مهم دی او د امریکایي همکارانو سره هم پکار دي او د ناندرو باید د امکان ترحده مخنوی وشي."
د ایران په ژمنو کې د هغو زرګونو سنترفیوزونو او ماشینونو بیکاره کول هم شامل دي چې په جلا په لویه پیمانه د یورانیمو د غني کېدو د پروسې د یوې برخې په توګه پکې مواد پخیږي.
کله چې د اتومي موافقې اجرات پیل شي، د متحده ایالاتو جمهور ریس بارک اوباما به ځینو ادارو ته داسې رسمي لارښود ولیږي چې د احتمالي اړتیا په صورت کې د بدلون او اضافي ارزونو د پیل لپاره چمتو شي.
د اکتوبر په ۱۹ د دوشنبې په ورځ به د ایران، د امنیت د شورا د پنځو دایمي غړو او د اروپایي ټولنې استازي په ویانا کې د لمړني ګډ کمیسون غونډه وکړي.
