په پاکستان کې د خصوصي کولو کمیسیون د سه شنبې په ورځ اپریل ۲ (وري ۱۴) وویل چې ددغه هېواد زیانمن ملي هوايي شرکت د اسهامو په بازار کې خرڅلاو ته وړاندې کیږي.
د خصوصي سازۍ د کمیسیون دا اقدام د پیسو نړیوال صندوق له خوا په پاکستان کې د مالي اصلاحاتو د غوښتنې په اساس کیږي.
د پاکستان نړیوال هوايي شرکت (پي ای اې) تراوسه په میلیاردونو پاکستانۍ روپۍ تاوان کړی او د خصوصي کولو کمیسیون پانګه اچوونکو ته ددغه شرکت له ۵۱ څخه تر ۱۰۰ سلنې ونډې د پیرلو دپاره د وړاندیزونو سپارلو ته د مۍ درېیمې نیټې پورې وخت ټاکلی دی.
ددغه کمیسیون په وبسایټ کې په خپرو شویو معلوماتو کې ویل شوي: "د پاکستان نړیوال هوايي شرکت له سره تنظیم شوی او پانګه اچوونکو ته د بشپړ خدماتو لرونکي هوايي شرکت کې د پانګونې زمینه برابروي."
کمیسیون همدارنګه ویلي چې د اصلاحاتو له مخې، د هوايي شرکت ۶۰۳ میلیارد روپۍ (۲.۲ میلیارد ډالر) پورونه کم کړل شوي او د یوازې ۲۰۳ میلیارد روپیو (۷۵۰ میلیون ډالر) قرضې سره پلور ته وړاندې شوی دی.
د پاکستان نړیوال هوايي شرکت ټولې ۳۴ الوتکې لري چې ۱۷ یې اې-۳۲۰ ایربس، ۱۲ بوینګ بي-۷۷۷ او پنځه نورې د محلي پروازونو وړې الوتکې دي.
که څه هم دغه شرکت له ۸۷ هېوادونو سره د خدماتو قراردادونه لاسلیک کړي خو په وروستیو کلونو کې یې یو شمېر هېوادونو ته پر پرواز بندیز ددې لامل شوی چې د منځني ختیځ هوايي شرکتونه په پاکستان کې د هوايي سفرونو اړتیا پوره کړي.
پي ای اې د پاکستان د هوايي چلند یوازې ۲۳ سلنه جوړوي په داسې حال کې چې د منځني ختیځ هوايي شرکتونه ددغه مارکیټ ۶۰ سلنه برخه جوړوي.
په ۲۰۲۰ کې، په کراچۍ کې د پي ای اې د یوې الوتکې د غورځېدو په پېښه کې د نږدې ۱۰۰ کسانو له مړینې وروسته معلومه شوه چې د الوتکې پیلوټ ته جعلي لایسنس ورکړل شوی و. له دې پېښې وروسته د اروپایي اتحادیې د هوانوردۍ د خوندیتوب ادارې بریتانیا او په اروپا کې نورو هوايي ډګرونو ته د پي ای اې پر پرواز بندیز ولګوه.
دغه بندیز اوس هم دوام لري او د پاکستان حکومت پارلمان ته ویلي چې ددې بندیز له کبله د پاکستان ملي هوايي شرکت ته د کاله شاوخوا ۴۰ میلیارده روپۍ تاوان رسیږي.
د خصوصۍ سازۍ کمیسیون وویل: "پي ای اې پلان لري چې د خپلو پروازونو شبکه ورغوي او بریتانیا، لویدیځې اروپا او متحده ایالتونو ته پروازونه له سره پیل کړي."
د پیسو نړیوال صندوق غوښتنې
پاکستان د جون په میاشت کې د پیسو د نړیوال صندوق څخه درې میلیارد ډالر پور ترلاسه کړ. په بدل کې اسلام اباد د مالي اصلاحاتو ژمنه کړې ده چې د ملي هوايي شرکت خصوصي کول هم پکې شامل دي.
د پیسو نړیوال صندوق د پاکستان په ټولو دولتي تصدیو کې د اصلاحاتو غوښتنه کړې ده.
تمه کیږي چې د ونډو په بازار کې د پی ای اې له پلورلو سره پاکستان وکولای شي چې د پیسو نړیوال صندوق څخه نوره مرسته ترلاسه کړي.
فورم \ دبحث خونه