د افغانستان د کرکټ د ملي ټیم انتظامي مسول یا منیجر شفیق الله عصمت ستانکزی وايي چې د کرکټ بورډ په هلو ځلو په لومړي ځل د کرکټ د نړیوالې شورا د بشپړ غړیتوب لرونکي هیواد زمبابوې ته د څلورو یو ورځنیو سیالیو او دوه څلور ورځنیو سیالیو په ترکیب سفر برابر شو.
هغه وايي چې لوبغاړو ددې ستر فرصت نه ښه گټه پورته کړه او څلور یو ورځینیو سیالیو د دوه دوه مساوي ترسره کولو او دوه څلور ورځنیو سیالیو یا ټیسټ لوبو د یو بري سره برابر تمامولو دا وښوده چې دوي د اولې درجې د ټیم په اندازه قابلیت او صلاحیت لري.
نجیب ځدران یو ځل بیا زمبابوې کې خپله وړتیا وښوده
د زمبابوې د پایتخت هرارې نه د امریکا غږ آشنا راډیو سره په ټیلي فوني مرکه کې شفیق ستانکزي وویل چې دوي د زمبابوې د ملي ټیم سره د یو ورځنیو سیالیو دپاره جلا او د زمبابوې د الف ټیم سره سیالیو دپاره جلا ټیم زمبابوې ته راوسته، چې د کرکټ په دواړو شکلونو کې لوبغاړي ښه وځلیدل.
هغه وویل چې د زمبابوې سره د څلورو یو ورځنیو سالیو نه دوه گټل، د کرکټ نړیوال مبصرین او مهمې سپورتي رسنۍ حیرانې کړیدي او افغانستان ېې د دویمې درجې کرکټ ټیمونو ته د غوره مثال په توگه وړاندې کړی دی.
د کرکټ ملي ټیم کپتان محمد نبي د یو ورځنیو سیالیو د جام سره
شفیق ستانکزی زیاتوي چې کرکټ بورډ به اوس په دغو سیالیو کې د هر لوبغاړي کارکردگي څیړي او د راتلونکو نړیوالو لوبو دپاره به ورنه یو غوره ټیم انتخاب کړي.
هغه دا هم وویل چې د ځوان او تجربه لرونکو لوبغاړو یو ترکیب به ډیر قوي ټیم ثابت شي.
بلخوا د افغانستان د کرکټ ملي ټیم پخواني کپتان او د الف ټیم روزونکي رئیس احمد زی وايي چې د زمبابوې د کرکټ ډیر پاخه او تجربه لرونکي لوبغاړي زموږ د ځوان لوبغاړو سره مخامخ شول او په لومړۍ څلور ورځنۍسیالۍ کې ېې په ماتې ورکولو حیران کړل.
هغه وویل دغه بري د ټیم لوبغاړو ته یو مورال ورکړو. داچې په دویمه څلور ورځنۍ سیالۍ کې د ځینو سهوو په اساس برۍ ترلاسه نشو، خو بیا هم په مجموع کې توپ اچونکي او توپ وهونکي ښه وځلیدل.
په دې سیالیو کې د عثمان غني په څیر ځوان لوبغاړي ښه وځیدل
رئیس احمدزی وايي چې افغانستان اوس د ښو لوبغاړو یوه ستره قافله لري او د هر ډول او د هر ټیم سره مقابلې دپاره ټیمونو په انتخاب کې به مشکل نه لري.
هغه وویل چې زموږ لوبغاړو چې زمبابوې نه کور ته ستنیږي، نو ډک لاسونه ځي. هم د یو ورځنیو لوبو گټلی جام وړي او هم د زمبابوې نه ښه ډیره تجربه او ښې خاطرې.
Your browser doesn’t support HTML5
د شفیق الله ستانکزي سره مرکه