د شپږیزې لیګ د ګروپي سیالیو په وروستۍ لوبې کې د بند امیر ښامارانو د کابل بازانو ته ماتې ورکړه.
راشد خان د بند امیر د ښامارانو او اصغر ستانکزي د کابل بازانو د لوبډلو کپټانان دي.
کابل بازانو بند امیر ښامارانو ته د ۱۳۳ منډو هدف ورکړ، خو هغوې د پینځو لوبغاړو په سوځېدو سره په ۱۸ اورونو کې پوره او لوبه یې وګټله. د لوبې غوره لوبغاړی د بند امیر شاهدالله شو چې دوه لوبغاړي یې هم وسوځول او ۵۱ منډې یې وکړې.
په دې لوبې سره د سر څلور لوبډلې معلومې شوې. بند امیر ښاماران اول، د محمد نبي په مشرۍ د مس عینک اتلان دویم، د کابل بازان درېیم او د شاهپور ځدران په مشرۍ بست ساتونکي څلورم نمبر شول.
د چهارشنبې په ورځ به د راشد خان لوبډله د محمد نبي له لوبډلې سره لوبه کوي او ګټونکي به فاینل ته وځي او بایلونکي به یې د کابل بازانو او بست ساتونکو ترمنځ د لوبې له ګټونکيو سره لوبه کوي او فاینل ته به د وتلو لپاره خپل بخت بیا وازمايي.
په دې مانا چې د جدول د سر دوه ټیمونه فاینل ته د وتلو دوه چانسونه لري.
د شپږیزې پایلوبه د جمعې په ورځ – سپتمبر۲۲- ده.