د روسیې او اروپا مشران د پخواني شوروي اتحاد د مشهور لیکوال الکساندر سولژینتسن په مړینې ماتم کوي.
د نوبل د جایزې گټونکي الکساندر سولژینتسن، چې له شوروي اتحاد سره یې د خپل مخالفت له آمله نړیوال شهرت درلود، د ٨٩ کلنۍ په عمر د یکشنبې په ورځ په ماسکو کې مړ شو.
د شوروي وروستي جمهور رئیس میخایل گوربجوف لومړنی لیکوال بللی چې د جوزف سټالین د غیر انساني حکومت په خلاف یې غږ پورته کړی و.
د روسیې اوسني جمهور رئیس دیمیتري میدویدوف او صدراعظم ویلادمیر پوټین هم د سولژینتسن په مړینه خواشیني څرگنده کړې ده.
د جرمني صدراعظمي انگیلا مرکل په یوې خپرې شوي اعلامیې کې الکساندر سولژینتسن ستایلي او ویلي یې دي چې هغه د شوري اتحاد په راپرزولو کې مهم رول لوبولی دی.
ټاکل شوې ده چې الکساندر سولژینتسن د چهارشنبې په ورځ په ماسکو کې خاورو ته وسپارل شي.