د افغانستان اجرايي ریاست د دغه هېواد د ټاکنو د خپلواک کمیسیون له لوري د تېرو ولسمشریزو ټاکنو د پایلو اعلان بې اعتباره، نامشروع او غیر مسولانه کار وباله.
د اجرايي ریاست د ویاند مرستیال جاوید فیصل د امریکا غږ اشنا ته وویل "د افغانستان د انتخاباتو خپلواک کمیسیون له حکومت او خلکو سره هېڅ رسمیت نلري او د اعتبار وړ نه دی، بنآ د دغه کمیسیون له ادرس نه چې هر کار کیږي، نامشروع او قابل اعتبار نه دي".
ښاغلي فیصل وویل په کار وه چې د انتخاباتو کمیسیون په خپل وخت سره دا نتایج اعلان کړي وای او په خبره یې د دغه کمیسیون " د کمزوري فعالیت او ضعیف مدیریت له کبله انتخابات د بحران خوا ته ولاړل".
د امریکا غږ اشنا راډیو هڅه وکړه چې په دې اړه د جمهوري ریاست غبرګون هم ولري، خو هغوی په دې اړه له څه ویلو ډډه وکړه.
زړې ټاکنې او نوې پایلې
د افغانستان د انتخاباتو د خپلواک کمیسیون مشر احمد یوسف نورستاني د ۲۰۱۴ کال د ولسمشریزو ټاکنو نتایج په ۲۰۱۶ کال کې اعلان کړل.
ښاغلي نورستاني په کابل کې خبریالانو ته وویل چې هغه مهال یې هم د ټاکنو د نتایجو یوه-یوه کاپي یې دواړه کاندیدانو محمد اشرف غني او عبدالله عبدالله ته استولې وه، خو په خبره یې دواړو کاندیدانو توافق وکړ چې د ځینو هېوادنیو مصلحتونو له کبله باید وروستۍ پایلې اعلان نشي.
د ننیو اعلان شویو شمیرو له مخې د ۳.۹ میلیونه رایو څخه یې ۵۵.۲۷ محمد اشرف غني او ۴۴.۷۳ یې عبدالله عبدالله وړي دي.
ښاغلي نورستاني وویل چې دا د دوی دنده او مسولیت وو چې باید نتایج اعلان کړي.
د ملي یوالي د حکومت له جوړېدو وروسته دواړو مشرانو د انتخاباتو په کمیسیونونو کې د اصلاحاتو د راوستلو ژمنې وکړې، خو پارلمان د ولسمشر هغه فرمان رد کړ چې له مخې یې باید د انتخاباتو قانون تعدیل شي او په دغه کار سره د انتخاباتي اصلاحاتو لړۍ تکنۍ او ځنډنۍ شوه.