په کندهار کې د وچې میوې سوداګر وايي چې د حکومت د نه پاملرنې له امله سږکال له جنوبي ولایتونو څخه د شکر پارې صادرات کم شوي.
له شکر پارې څخه چې د زردالو یو ډول دی د درملو په ګډون د بیلابیلو خوراکونو په ترکیب کې کار اخیستل کیږي.
سوداګر وايي چې د نشه يي توکو ډېرو پخوانیو کروندګرو اوس پر خپلو ځمکو د شکر پارې نوي باغونه جوړ کړي، خو دا چې نه مارکېټ لري او نه یې په معیاري ډول تیارولی شي نو له همدې امله له تاوان سره مخ کیږی.
چین د جنوبي ولایتونو د شکر پارې د حاصلاتو لپاره تر ټولو لوی مارکېټ دی خو تر څنګ يې هند، پاکستان او ځينو نور هیوادونه هم صادرات تر سره کیږي.
د اروزګان او زابل ولایتونه د شکرپارې زیات تولید لري چې د کندهار له مارکېټونو څخه بیا نړیوالو مارکېټونو ته صادریږي.
چارواکي وايي چې تېر کال ۲۵ زره ټنه شکر پاره د چین، هند، ویتنام او ځينو نورو هیوادونو تر مارکېټونو پوري رسول شوې خو سږکال دغه کچه ۱۲ زره ټنه ته را کښته شوې.
د پکېنګ او بسته بندی په برخه کې لاهم باغ لرونکې او په محلي کچه پانګه وال د نړیوال مارکېټ غوښتنې نشي پوره کولای.
د وچي مېوې د اتحاديې ریس حاجي عبدالاحد وايي چې د نشه يي توکو زیاتره پخوانیو کروند ګرو اوس پر خپلو ځمکو د شکر پارو باغونه جوړ کړي.
هغه وايي " په کار ده چې زموږ کروندګرو او سوداګرو ته د بسته بندۍ په برخه کې، د تیارولو په برخه کې پوهاوی ورکول شي، ډېر وخت د همدې ستونزو له امله زموږ حاصلات په نړیوال مارکېټ کې ځای نه پیدا کوي".
دی زیاته وي چې که حکومت د نړیوالو مارکېټونو د غوښتنو او معیار په برخه کې د شکر پارې باغ لرونکو ته پوهاوی ور نه کړي نو دوی به هر وخت د ګټې پر ځای له تاوان سره مخ وي.
د نشه يي توکو زیاتره پخواني کرونده ګر وايې چې د بدیلو کښتونو په هڅه کې دي خو د حاصلاتو لپاره يې بازار او د بازار له غوښتنو سره سم د صادراتو په برابرولو کې له ستونزو سره مخ دي.