د کندهار د عامي روغتیا ریاست وايي چي د دې ولایت په هغو ولسوالیو کې يې د پوليو کمپاین نن پيل کړی چي مخکې پکښې د واکسین کمپاینونه کمزوری عملي شوي .
د کندهار د عامي روغتیا ریاست د واکسین د همږغۍ د برخي مسئول ډاکتر عزیزالله کاکړ وايي چي دوی په نوي میلادي کال کي په ټول کندهار کې له واکسین څخه پاته سیمه نلري خو په تیر کال کي دغه ستونزه د دوی لپاره لوی خنډ وو .
په تیر کال کي د کندهار په غورک ، شاه ولي کوټ ، ارغستان او ځینو نور سیمو کې د نا امنیو له کبله څو کلسټرونه په مسلسله توګه د واکسین له پوښښ څخه پاته وې .
دغه راز نوموړی زیاته وي چي پر ډیورنډ کرښه يې په سپين بولدک ولسوالۍ کې د افغانستان او پاکستان ترمنځ د تلونکو تر لس کلنۍ پوري ماشومانو ته واکسین تطبیق کوي .
له ښاغلي کاکړ سره زموږ همکار عزیزالله پوپل مرکه کړې او په پيل کي يې په کندهار کې د کمزورو ولسوالیو د واکسین د جریان او له ټاکلي نيټي څخه د ځنډ په اړه پوښتلي .
