امریکا ته راغلو د افغان کرکټ لوبغاړو ټیم افغان المصافي پرله پسې دوه ماتو نه پس دوه بریاوې ترلاسه کړې او مقابل ټیمونه ېې مات او خپله د امریکا د یو ایس کرکټ سیالیو فاینل ته ورسیدل.
نن په لومړي سیمي فاینل کې د افغان المصافي ټیم کپتان جاوید احمدي پجه وګټله او د هیوسټن ټیم ته ېې د توپ وهنې نوبت ورکړ. د هیوسټن ټيم د شلو اورونو نه پس یو سل اته شپیته منډې وکړې چې رضوان چیمه پکې ۵۷ منډې وکړې.افغانستان لخوا ګلبدین نایب نن بیا ښه توپ اچونه وکړه او د هیوسټن درې لوبغاړي ېې وسوزول.
افغان المصافي ۱۶۹ منډو په هدف کې اوله وکټه د نجیب ترکي په لومړي توپ دلاسه ورکړه خو بیا جاوید احمدي او نوروز منګل د مقابل ټیم کلکه مقابله وکړه او د اتیا منډو ملګرتیا ېې وکړه ،جاوید ۴۷ او نوروز ۶۴ منډې وکړې .ورپسې حشمت شهیدي او ناصر جمال هم په وکټه ودریدل او ۴۳ او ۲۰ منډو کولو سره ېې ټيم نولسم اور کې بري ته ورسوه.
نوروز منګل د لوبې غوره لوبغاړی اعلان شو.هغه د لوبې نه پس وویل چې المصافي ټیم خپل باور ترلاسه کړی او انشاالله فاینل به هم ګټي.
