د افغانستان لویه څارنوالي وايي چې د روان مالي کال په نهو میاشتو کې د نشه يي توکو د قاچاق اړوند څه باندې څلور زره او ۳۰۰ قضیې څیړل شوي دي.
د دغې ادارې ویاند جمشید رسولي وايي چې د دغو قضیو په تړاو لسګونه ټنه نشه ييتوکي هم کشف او نیول شوي دي.
ښاغلی رسولي وايي "د مخدره موادو د د ۴۳۰۵ قضیو په تړاو څارنوالۍ او کشفي او امنیتي ارګانونو شاوخوا اته نیم ټنه اپین ترلاسه کړي دي، یعنې هغه کسان چې د مخدره موادو قاچاق یې کاوه، مخدره مواد یې تولیدول او په یو ډول نه یو ډول یې د مخدره موادو په قضیو کې لاس درلود، د دوی په نیولو سره شاوخوا اته نیم ټنه یا اته زره او ۳۸۴ کیلوګرامه اپین ترلاسه شوي، دغه راز څه باندې ۱۲ ټنه یا ۱۲زره او ۴۴ کیلوګرامه چرس و او ۴۷ کیلوګرامه (کا) ټابلیټ چې یو ډول نشهيي مواد دي او ترې استفاده کېږي، دا زموږ د همکارانو د اجراآتو په نتیجه کې ترلاسه شوي دي".
ښاغلي رسولي په دغو قضیو کې د ښکیلو کسانو د شمیر په اړه څه ونه ویل خو زیاته یې کړه چې نیول شوي کسان په یو ډول نه یو ډول د مخدره موادو په کاروبار کې ښکیل و.