افغانستان د زراعتي علومو او تکنالوجۍ ملي پوهنتون په جنوبي ولایتونو کې د تریاکو د بدیلو کښتو په برخه کې خپل فعالیتونه زیات کړي.
د دې پوهنتون مسئولین وايي چې پر ډېرو داسې کښتونو یې څېړنې کړي چې هم د تریاکو ښه بدیلونه دي او هم به یې حاصلات کروندګرو ته ښه ګټه وکړي.
دغه پوهنتون چې په کندهار کې دی د کرنې په بېلا بېلو برخو کې د ماسټرۍ په کچه محصلین روزي.
د انستو پوهنتون کندهار ښار په جنوب کې هوايي ډګر ته نږدې د خپلو کرنیزو تحقیقاتو او د ګټورو نباتي بوټو د ترویج لپاره پنځه زره جریبه کرنیزه ځمکه په واک کې لري.
د نوموړي پوهنتون سرپرست پوهنمل فواد احساس وايې چې د تریاکو د بدیلو کښتونو په برخه کې يې د ګټورو نباتاتو څېړني بریالی وې او اوس يې د ترویج پر لارو چارو باندي دوی خپله طرحه له حکومتي ادارو سره شریکه کړې.
نوموړی د نشه يي توکو د بدیلو کښتونو د ترویج لپاره د جنوبي ولایتونو زراعتي ځمکي تر ټولو غوره سیمې ګڼي.
هغه وايي" موږ د تریاکو د بدیلو کښتونو په اړه ډېرې څېړنې کړي، خپله طرحه مو له حکومت سره شریکه کړې ده تر څو په افغانستان کې د تریاکو د مخنیوي په لار کې ګټه ځنې واخلي".
د زراعتي چارو متخصصین وايي چي د زراعت په برخه کې نوي تحقیقات د کمیت او کیفیت له پلوه په حاصلاتو کې زیاتوالی راوستلای شي.
د زراعت متخصص پوهندوی شاه محمود بری وايي چې جنوبي حوزه تر لسو زیات کوچني اقلیمي شرایط لري چي د نویو څېړنو پر بنسټ کښتونه به د کروندګرو په اقتصاد اغېزمنه مرسته وکړي.
د زراعتي چارو ماهرین وايي چې د هلمند سیند حوزه د افغانستان د زراعت ۶۰ سلنه زراعتي ځمکه جوړوي چې د زراعت په برخه کې علمي او تحقیقاتي پروګرامونه د دې سیمې د ګروندګرو له اقتصاد سره بنسټيزه مرسته کولای شي.