ډاکټران وایي د هغو معتادینو درملنه چې کرسټال او هیرویین استعمالوي، د نورو معتادینو په پرتله ستونزمنه ده.
په کابل کې د جنګلک د معتادینو د درملنې په ۲۵۰ بستریز روغتون کې یو ډاکټر عنایتالله ستاري وايي چې د کرسټال او هیرویینو کارول د انسان پر مغزو باندې ژورې منفي اغیزې کوي چې درملنه تر درېیو کلونو وخت ته اړتیا لري.
هغه وايي "په لومړي پړاو کې هغه ناروغان چې هیرویین او کرسټال استعمالوي د تداوۍ او بستر په جریان کې ډیرو ستونزو سره مخ کیږي ځکه چې دغه نشهيي مواد د ناروغانو عصبي سیستم ته زیان رسوي او زموږ ناروغانو په دغه حالت کې ډیر تاوتریخوالی کوي".
د ډاکټر ستاري په وینا د هیرویینو او کرسټالو اغیزې له شپږو میاشتو څخه نیولې تر درېیو کلونو پورې د معتاد په بدن کې وي او هر وخت یې د نشهيي موادو بیا کارولو ته هڅوي.
دی وايي کله چې هیرویین او کرسټال د انسان عصبي سیستم ته دننه شي ورته ډېر زیان رسوي او په خورا سختۍ سره بیرته عادي حالت ته ګرځي.
دا څرګندونې په داسې مهال کېږي چې په افغانستان کې د شیشې یا کرسټال د کارولو کچه په معتادینو کې زیاته شوې چې له امله یې په خلکو کې جدي اندېښنې راپورته کړې دي.