د افغانستان د ملي امنیت سلاکار محمد حنیف اتمر چین ته د خپل سفر پر مهال د دغه هیواد له بهرنیو چارو وزیر او لوی درستیز سره پر پوځي، امنیتي او د دوه اړخیزو همکاریو پر پراختیا خبرې کړې دي.
د ملي امنیت شورا ویاند قادر شاه امریکا غږ آشنا ته وویل، ښاغلي اتمر په دغه سفر کې یو ځل بیا له چین څخه غوښتي، چې د غرنیو ځواکونو د لیوا د تجهیز په برخه کې، له افغانستان سره مرسته وکړي.
هغه وویل "دا (لوا) به د افغانستان د امنیتي ځواکونو په چوکاټ کې جوړه شي او د تجهیزاتو په تړاو یې له چین څخه د همکاریو غوښتنه شوې ده".
د افغانستان د ملي امنیت شورا په یو بیان کې ویلي، چې ښاغلي اتمر د چین له لوی درستیز لي زوچینګ سره د لیدنې پر مهال، د دغې لوا جوړیدل د افغانستان او چین ترمنځ په غرنیو سرحدي سیمو کې د ترهګریزو ډلو د فعالیتونو د مخنیوي لپاره مهم بللی دی.
په بیان کې راغلي، چې د چین لوی درستیز د دواړو هیوادونو ترمنځ د ګډو امنیتي او پوځي همکاريو په ځانګړي توګه د افغان ځواکونو د تجهیزولو په برخه کې چمتوالی ښودلی دی.
ښاغلي اتمر دغه راز په دې سفر کې د چین د بهرنیو چارو وزیر با وانګ یي سره هم لیدنه کړې ده او د افغانستان، چین او پاکستان تر منځ د درې اړخیزو ناستو پر دوام یې خبرې کړې دي.
د ملي امنیت شورا په یو جلا بیان کې ویلي، چې دواړو خواو په نږدې راتلونکې کې د دریو هیوادونو د بهرنیو چارو وزیرانو د غونډې په جوړولو سلا کړې ده.