د نړۍ رهبرانو پرېکړه کړې چې د لېیبا په جګړه کې ذیدخلو خواوو ته نور پوځي مهمات نه ورکوي.
د جرمني په برلین ښار کې د یک شنبې په ورځ [جنوري ۱۹] د یوې غونډې په ترڅ کې برخه والو ویلي چې د پرېکړې پر سرغړونکو به بندیزونه ولګوي.
د ملګرو ملتونو، اروپایې ټولنې، افریقايي ټولنې او عرب لیګ د استازو په شمول، د نړۍ دوولسو رهبرانو موافقه وکړه چې په لېبیا کې به شخړې ختموي.
د لېبیا د پوځ ځواکمن جنرال خلیفه حفتر د هېواد ختیځ کنټرولوي او روسیه، مصر او متحده عربي امارات یې ملاتړ کوي.
په طرابلس کې د فائض السراج له حکومت نه ملګري ملتونه، امریکا ځينې اروپايي هېوادونه او ترکیه ملاتړ کوي.
د ترکیې ولسمشر رجب طیب اردوغان د اوربند د منلو له امله له سراج نه مننه کړې او له خلیفه حفتر نه یې غوښتي چې اوربند وکړي.
د امریکا د بهرنیو چارو وزیر مایک پمپیو خبریالانو ته ویلي چې په لېبیا کې د بشپړ اوربند لپاره ډېر پرمختګ شوی دی.
همدارنګه، د جرمني صدراعظمې انګلا مرکل وویل ټولې خواوې منلې چې په لېبیا کې سوله د خبرواترو له لارې راځي، نه په پوځي قوت.
د اروپايي ټولنې د بهرنۍ پالیسۍ مشر جوزف بورېل ویلي چې په لېبیا کې دې اوربند باید جدي وڅارل شي. هغه وویل داسې نه کېږي چې "اوربند ووایې او هېر یې کړئ."
