د هند یو ۱۸ کلن ځوان للیت پتیدار، چې د وجود ۹۵ سلنه یې په وېښتو پوښلې، په نړۍ کې د ډېرو وېښتو لرونکي انسان لقب وګټه.
د ګینس نړیوالو ریکارډونو کتاب، چې پتیدار ته یې دا لقب ورکړی، ویلي دي چې د دغه ځوان د بدن په هر سانتي متر مربع کې ۲۰۲ وېښته وجود لري.
پتیدار له یو نادر رنځ څخه کړېږي چې هایپرتیرکوزیس یې بولي. دی له همدغه رنځ سره نړۍ ته راغلی چې په هر یو میلیارد انسان کې یو کس پرې اخته وي.
په دغې بیمارۍ کې د انسان د بدن په هغو برخو کې، چې نباید وېښته راشنه شي، شنه کېږي.
پتیدار د دغه لقب د ترلاسه کولو لپاره، د ایټالیا د میلان ښار ته ولاړ، هلته یو ډاکټر د هغه د بدن د یوې برخې وېښته وخریل او یو یو یې وشمېره چې ثابته شي هغه ډېر وېښته لرونکی انسان دی.
نوموړي د دغه لقب له ترلاسه کولو وروسته په یوې تلویزوني مرکې کې وویل: «د ویلو لپاره څه نه لرم، نه پوهېږم څه ووایم، ډېر خوشحال یم.»
پتیدار وویل چې په ښوونځي کې به یې ټولګیوال او نور زده کوونکي ترې یو ډول ډارېدل، خو کله چې پوه شول د ده د وجود باطن د نورو انسانانو په څېر دی، بیا یې ورسره ملګرتیا کوله.
هغه وویل: «هغوی به له ما ډارېدل، خو کله یې چې زه وپېژندلم بیا پوه شول چې زه له هغوی څخه ډېر توپیر نه لرم او یوازې ظاهري وجود مې متفاوت دی او باطن مې بدل نه دی.»
پتیدار وویل چې ځینې خلک ترې غواړي، د وجود وېښته وخريي، خو هغه وايي چې په همدې حال خوشحال دی. للیت پتیدار وویل: «هغوی ته وایم چې څنګه چې یم، همداسې مې خوښېږي او نه غواړم صورت مې بدل کړم.»
دا راپور د ګینس د نړیوالو ریکارډونو د کتاب د معلوماتو په اساس لیکل شوی.
فورم \ دبحث خونه