د ننګرهار هسکې مېنې ولسوالۍ کې د ملکیانو پر موټر چاودنې پنځه کسان وژلي او نهه نور یې زخمیان کړي دي
د ننګرهار امنیه قوماندانۍ ویاند حضرت حسین مشرقیوال امریکا غږ ته وویل چې چاودنه نن سهار نهه بجې د هسکې مېنې ولسوالۍ په ډب پاپین سیمه کې د ملکیانو په ډاډسن موټر شوې ده.
نوموړي وویل چې په وژل شویو کې یو یې ماشوم او څلور سړي دي.
د ننګرهار د والي ویاند عطا الله خوږیاڼي امریکا غږ ته وویل چې په دغه پېښه کې د دوو مېرمنو او څلورو ماشومانو په ګډون نهه عام وګړي ټپیان شوي هم دي.
د هسکې مېنې ولسوالۍ ولسوال سازولي وايي ډاډسن پک اپ موټر له جلال اباد ښار څخه د خټکي سیمې ته تلو او عام وګړي پکې ناست و چې د مختلفو سیمو اوسېدونکي وو.
هغه وايي په چاودنه کې موټر هم بشپړ ویجاړ شوی دی.
د ښاغلي خوږیاني د معلوماتو پر اساس چاودنه د افغان حکومت تر کنټرول بهر سیمه کې شوې ده.
تر اوسه ددغې چاودنې مسولیت په غاړه نه دی اخیستی.
د هسکې مېنې ولسوالۍ کې له دې وړاندې هم دغه ډول چاودنې شوي دي چې ملکیانو ته پکې مرګ ژوبله اوښتې ده.