د افغانستان د کرکټ ملي لوبډلې ځوان لوبغاړی صدیق اتل وایي چې د آیرلینډ سره په لوبه کې د منډو په کولو کې مشر لوبغاړي، محمد نبي ورسره ډیره مرسته کړې.
په یوې ویډیو کې چې د افغانستان کرکټ بورډ په رسمي فیس بوک پاڼې کې خپره شوې، دې ځوان لوبغاړي ومنله چې د لوبې په پیل کې په پرله پسې توګه د افغان توپ وهونکو سوځیدو له کبله د فشار لاندې و.
خو اتل وایي د مشر لوبغاړي په توګه محمد نبي ورسره د منډو په کولو کې مرسته وکړله.
هغه وویل، " ما نن له نږدې د محمد نبي مشري ولیده. زما د منډو په کولو کې یې ډیره ونډه درلوده. زه یې هر څه ته متوجه کولم چې څنګه لوبه وکړم".
سره لدې چې صدیق اتل د رحمان الله ګربز سره یو ځای د افغان لوبډلې لپاره د توپ وهنه پیل کړې وه خو محمد نبي داسې مهال ورسره په میدان کې یو ځای شو چې د افغانستان د سر څلور لوبغاړي سوځیدلي و او د ټولې لوبډلې منډې یوازې ۱۴ وې.
خو نبي او اتل په ګډه ۷۸ منډې وکړلې او په پای کې صدیق اتل چې د دوو منډو کولو هڅه یې کوله، وسوځید.
دا دویم ځل و چې صدیق اتل د افغانستان ملي لوبډلې لپاره شل اوریزه لوبه کوله. هغه په لومړۍ لوبې کې یوازې یوه او په دویمې کې ۳۵ منډې وکړلې.
افغانستان د یکشنبې ورځې په لوبې کې آیرلینډ لوبډلې ته د ۱۰ منډو په توپیر ماتې ورکړه.
د افغانستان او آیرلینډ تر منځ دریو شل اوریزو لوبو لړۍ کې دواړو لوبډلو یوه یوه لوبه ګټلې ؛ دریمه او وروستۍ لوبه دوشنبه مارچ ۱۸مه د شارجې په لوبغالي کې کیږي.
فورم \ دبحث خونه