د ننګرهار بټي کوټ ولسوالۍ کروندګر وایي چې سږکال یې پر هغو ځمکو هندواڼې او خټکي کرلي وو چې تېرکال یې په کې په پرېمانه کچه کوکنار کرل شوي وو .
دوی وایي تېرو کلونو کې به یې پرخپلو ځمکو کوکنار کرل او بیابه یې د ساتنې لپاره وسله والو طالبانو او داعش ډلې ته پناه وړله.
دوی وایي سږکال یې په خپله خوښه د کوکنارو له کرلو ډډه کړې او پر ټولو ځمکو کې یې هندواڼې او خټکي کرلي چې تر کوکنارو یې حاصلات څو وارې زیات دي.
دوی وایي چې د دوی لپاره د کوکنارو ښه بدیل هندواڼې او خټکي دي چې د پلور غټ بازار یې د تورخم-جلال آباد لویه لار ده.
د بټي کوټ کروندګر وایي چې د خپلو کوکنارو د ساتنې لپاره او د دولتي کمپاینونو د مخنیوي لپاره به یې وسله والو طالبانو او داعش ډلې ته پناه وړله او د هغوی په مرسته به يې پر خپلو ځمکو کرل شوي کوکنار ساتل.