له هرات نه راپورونه وايي چې وسله والو طالبانو د اختر په شپه د سلما بند پر ساتونکو پولیسو برید کړی دی.
چارواکي وایي په دغه برید کې لږ تر لږه ۱۰ افغان پولیس وژل شوي دي او یو بل ژوبل شوی دی.
د هرات د والي ویاند جیلاني فرهاد امریکا غږ اشنا ته وویل چې وسله والو طالبانو د هرات د چشت شریف په ولسوالۍ کې د سلما د اوبو د بند د ساتنې پولیس په نښه کړي دي.
ښاغلي فرهاد وویل څلور بریدګر هم وژل شوي دي او یو تن بل ټپي شوی هم دی.
وسله والو طالبانو تراوسه د دې برید په هکله څه نه دي ویلي.
د سلما بند د هند-افغانستان د دوستۍ د بند په نامه هم پېژندل کیږي. دا بند په ۲۰۱۶ کال کې د هند لومړي وزیر نرېندرا مودي او ولسمشر غني رسمآ پرانیست.
هند د دغه بند پر جوړولو شاوخوا ۲۷۰ میلیونه ډالره ولګول. د سلما بند د ۴۲ میکاواټه برېښنا د تولید ظرفیت لري او پر دې سربېره زرګونه جریبه ځمکه خړوبوي.
