ارمنستان او اذربایجان د سه شنبې په ورځ فبروری ۱۳ (سلواغې ۲۴) یو بل پر خپله ناکراره ګډه پوله د ډزو په کولو تورن کړل، ارمنستان وايي، څلور سرتیري یې په ډزو کې وژل شوي او یو شمېر نور ټپیان دي.
دا پېښه د سیونیک په جنوبي سیمه کې شوې ده. دواړو هېوادونو د ناګورنو قره باغ سیمې په سر، په ۲۰۲۰ او ۱۹۹۰ لسیزه کې، دوه جنګونه کړي. اذربایجان تیر کال د لنډو عملیاتو په ترڅ کې دا سیمه بیرته ونیوله.
د ارمنستان د دفاع وزارت په یوه خبرپاڼه کې وویل: "د اذربایجان وسله والو ځواکونو د سه شنبې په ورځ د نیرکین هانډ (کلي) په شاوخوا کې د ارمنستان د امنیتي پوستو په لور د کوچنیو وسلو ډزې وکړې."
خبرپاڼه زیاتوي په دغه برید کې څلور عسکر ووژل شول او ګڼ نور ټپیان شول.
خو د اذربایجان سرحدي ساتونکو ویلي چې د ارمني ځواکونو د دوشنبې د ورځې "پاروونکي اقدام" ته یې ځواب ویلي چې یو اذربایجانی سرتېری پکې ټپي شو.
د اذربایجان د دفاع وزارت ویلي، ارمنستاني پوځیانو د دوشنبې په ورځ ناوخته د تووز په شمال ختیځ کې د کوخانبي په کلي دوه ځله ډزې وکړې.
ارمنستان دا تور رد کړ او ویې ویل چې دا ادعا چې د دوی پوځیانو دوه ځله "د پولې په شمال ختیځ کې د اذربایجان د پوستو په لور ډزې کړې دي، له واقعیت سره سمون نه لري."
د سپتمبر په میاشت کې د قره باغ نږدې ۱۰۰ زره ارمنیايي اوسېدونکي وروسته له هغه ارمنستان ته وتښتېدل، چې اذربایجان دغه سیمه ونیوله او په ارمنیا کې یې د کډوالو کړکېچ راوپاراوه.
پر ګډې پولې اخ و ډب وروسته له هغه رامنځته شو چې د اذربایجان ولسمشر الهام علییف د پنځم ځل لپاره بیا وټاکل شو. اذربایجان د ګازو ډیرې زیرمې لري.
له بیلتون غوښتونکو ارمنیانو څخه د قره باغ د سیمې بیرته نیول د علییف د بریا یو عمده لامل ګڼل کیږي.
پر علییف باندې شک دی چې هڅه کوي د ارمنستان د سیونیک سیمه ونیسي ترڅو اذربایجان د نخچیوان له خپلواکې سیمې سره ونښلوي. دا سیمه له ایران او ترکیې سره ګډه پوله لري.
فورم \ دبحث خونه