هند کې د ټول هند د پښتون جرگې مشرې میرمن یاسمین نگار خان وايي چې دوي د هند د کلتور وزیر ښاغلي مهیش شرما سره د ملاقات په وخت دا غوښتنه ورنه کړې چې باید په بنگال کې یو پوهنتون د آزادۍ د ستر مبارزه او مهاتماگاندهي د عدم تشدد د فلسفې ملگري خان عبدالغفار خان باچا خان په نوم یو یادگاري پوهنتون جوړ شي.
د امریکا غږ اشنا راډیو سره مرکه کې میرمن یاسمین نگار خان ویلي چې د هند د کلتور وزیر د دې وړاندیز سره موافقه ښودلې او ویلي چې د هند دولت د باچاخان په نوم د پوهنتون جوړولو ته حاضر دی او د پوهنتون دپاره د ځای او تعمیر د پیل په اړه به اړونده چارواکو سره مشورو نه پس فیصله کوي.
د هند د کلتور د وزیر سره د میرمن یاسمین نگار خان لیدنه نوي دهلي کې د باچاخان د زیږون د یو سل پینځویشتمې کلیزې په مهال شوې ده،په غونډه کې هند کې د افغانستان سفیر ښاغلي ډاکټر شېدا محمد ابدالي هم گډون درلودو.
میرمن یاسیمن نگار خان چې ځان د باچاخان لمسۍ هم یادوي او وايي چې د دې پلار خان لالا جان خان د باچا خان نیزدې ملگری وه او باچا خان ورته خپل زوی بللې و، او دې خپله هم ماشومتوب کې باچا خان سره ډیر نیزدې نه لیدلي.
هغه وايي چې بنگال کې د باچاخان په نوم د پوهنتون جوړولو مقصد د باچاخان د عدم تشدد فلسفې خورول دي ،ترڅو هغه افغان پښتانه ځوانان چې نورو ځایونو کې د تشدد درسونه اخلي ،دلته د امن او ښگڼې سبق زده کړي او ورسره د باچا خان نوم هم هند کې ژوندی پاتې شي.
