د لغمان د والي ویاند اسدالله دولتزی وایي، چې د دوشنبې پر سهار ۱۰بجې او ۳۰ دقیقې د لغمان دولت شاه ولسوالۍ اړوند خاص دولت شاه کلي کې د یوه قومي مخور د جنازې په مراسمو کې د ماین چاودنه شوې ده.
دولتزي امریکاغږ ته وویل، چې په دې چاودنه کې تر دې دمه د ۳کسانو د وژل کېدو او د ۷ کسانو د زخمي کېدو پخلی کوي.
هغه زیاته کړه چې چاودنه د وسله والو طالبانو له لوري ترسره شوې ده.
دولتزي په چاودنه کې وژل شوي او زخمیان شوي ټول ملکي کسان او د جنازې لمونځ کوونکي یاد کړل.
په لغمان کې یوې سرچینې چې نه یې غوښتل نوم یې څرګند شي امریکا غږ ته وویل چې چاودنه د دولت د ملاتړي ملک عبدالشکور د جنازې په مراسمو کې شوې ده.
سرچینې وویل چې وژل شوي او زخمیان شوي کسان ټول د جنازې ګډونوال وو.
د لغمان مرکزي روغتون مؤظف داکټران وایي چې په دولت شاه کې د شوې پېښې جسدونه او زخمیان سیمه ییز روغتون ته لېږدول شوي او روغتیايي وضعیت یې د ډاډ وړ دی.
د افغانستان دفاع وزارت بیا ویلي، چې په دغه چاودنه کې درې ته وژل شوي او ۹ نور ټپیان شوي، چې د ملي امنیت منسوبین هم پکې شامل دي.
وسله والو طالبانو تر اوسه په دې تړاو رسنیو ته څه نه دي ویلي.
تر دې وړاندې هم په لغمان کې د ماشومانو د لوبو پر میدان او د عامو خلکو پر کورونو د توغول شوو مرمیو له امله عامو خلکو ته ډېر ځله مرګ ژوبله رامنځته شوې.
