د هند د ملي لوبډلې مخکني کپتان مهندرا سینګ دوهني په کپتانۍ کې د چنای سوپر کنګز لوبډلې دوشنبه مې ۲۹ (غرګولي۸) د هند غوره لیګ کرکټ سیالیو اتلولي وګټله.
دوی په په پایلوبې یا فاینل کې د ګجرات ټایټنز لوبډلې ته ماتې ورکړه او د پنځم ځل لپاره یې ددې سیالیو اتلولي خپله کړه.
سره لدې چې ټاکل شوې وه د فاینل دا لوبه د یکشنبې په ورځ شوې وای خو د باران له کبله دوشنبې ته وځنډیده.
د ګجرات لوبډلې په شلو اورونو کې ۲۱۴ منډې کړې وې خو د باران له کبله چې د لوبې د ځنډ سبب هم شوه د چنای لپاره هدف په ۱۵ اورونو کې ۱۷۱ وټاکل شو.
د چنای لوبډلې د لوبې په وروستیو دوو توپونو کې لسو منډو ته اړتیا درلوده او د هند ملي لوبډلې کیڼ لاسي لوبغاړي رویندرا جدیجا یوه شپږیزه او یوه څلوریزه ووهله او لوبه یې وګټله.
د ګجرات په لوبډلې کې د افغانستان مشهور ورو توپ اچوونکي راشد خان او ځوان لوبغاړی نور احمد لکڼوال لوبه کوي. پدې لوبې کې نور په دریو اورونو کې یوازې ۱۷ منډې ورکړلې او د سیالې لوبډلې دوه لوبغاړي یې وسوځول.
سره لدې چې راشد خان په فاینل لوبه کې ښه ونه ځلید خو په دغو سیالیو کې یې ۲۷ ویکټې واخیستې او د لیګ لومړی غوره ورو توپ اچوونکی شو. راشد خان همدغه راز د آی پي ایل سیالیو تر ټولو د غوره توپ نیوونکي جایزه هم ګټله.د هند احمد آباد په لوبغالي کې پای لوبه د شپې په ۱:۳۰ بجه پای ته ورسیده.
په دغو سیالیو کې تر ټولو ډېرې ۸۹۰ منډې د هند لوبغاړي شوبمن ګېل وکړي. دی هم د ګجرات په لوبډلې کې لوبېږي.
د هند بل لوبغاړي محمد شامي، د غه لیګ د سږني سیزن تر ټولو ډېر ویکټ اخیستونکی شو. ده ۲۸ کسان سوځولي وو. دی هم د ګجرات په لوبډلې کې دي.
او د هند بل ځوان لوبغاړی یاشاسوي جایسوال بیا د دغه لیګ نوی رادبره کېدونکی ستوری ونومول شو. ده په ماشومتوب کې د سړک په غاړه چای خرڅول او په ډېرې سختۍ سره یې کرکټ ته ملا وتړله او دې حد ته يې ځان ورسوه.
د هند د کرکټ دا لوی تجارتي لیګ هرکال کې یو ځل کېږي. تېرکال د ګجرات لوبډلې دا اتلولي ګټلې وه. سږکال په دغه لیګ کې لس لوبډلې وې. په دې لیګ کې د هند او نړۍ سلګونه لوبغاړي لوبېږي او میلیونونه ډالر پانګونه په کې کېږي.