د پکتيکا پوليس وايي د دغه ولايت په جاني خېلو ولسوالۍ کې د کوچیانو د واده په مراسمو د سړک غاړ په ماين چاودنه کې ۲۰ تنه ټپیان شوي دي.
د پکتيکا د پوليسو وياند شاه محمد آرين نن یکشنبه سپټمبر ۲۰ (وږې۳۰) امريکا غږ ته وويل چې ياده چاودنه پرون مازديګر مهال د جاني خېل ولسوالۍ ښارګوټي ته نږدې د کوچيانو پر هغه تراکتور شوې ده چې ناوې يې په کې انتقالوله.
آرين ونه ويل چې په چاودنه کې ناوې هم ټپي شوې که څنګه، مګر زياته يې کړه چې د پېښې زياتره قربانيان ښځې او ماشومان دي.
بل لوري ته د پکتيکا د عامې روغتيا سرپرست رئيس ډاکټر اسدالله رسولي امريکاغږ ته وويل چې د پېښې له ځايه د خيرکوټ ولسوالۍ روغتون ته ۱۹ تنه ټپيان وروړل شوي چې د اوو کسانو حالت نازک و او دا مهال د ښرنې په روغتون کې تر درملنې لاندې دي.
د ډاکټر اسدالله رسولي په وينا، په ټپيانو کې اته ماشومان، پنځه ښځې او شپږ سړي دي.
بلخوا تیره شپه په بلخ ولایت کې هم د سړک غاړې ماین چاودنې له امله د چارواکو په وینا یو تن وژل شوی او پنځه نور ټپیان شوي دي.
د کورنیو چارو وزارت هم په یوې اعلامیې کې ویلي چې د پکتیکا د تیرې ورځې چاودنې کې هم یو تن ملکي وګړی وژل شوی دی.
تر دا مهاله د دې بمي چاودنې مسؤليت چا پرغاړه نه دی اخيستی او نه هم وسله والو طالبانو په دې اړه څه ويلي، خو د پوليسو وياند شاه محمد آرين يې پړه پر طالبانو واچوله.
دا په داسې حال کې ده چې تېره ورځ په پکتیکا کې د سړک غاړې ماین چاودنې له امله د دغه لایت د امر محمد اصف هم ووژل شو.
