اروپايي ټولنه وايي چې له افغانستان سره به خپلې سیاسي او مالي مرستې په دې شرط روانې ساتي چې په دغه هېواد کې د جمهوریت نظام وي.
افغا حکومت د اروپايي ټولنې دا دریځ ستایلی دی. جمهوري ریاست نن شنبه د مې ۳۰(غبرګولې۱۰) ویلي د افغان سولې بهیر، د افغانستان د بیارغونې او بشري حقونو په برخه کې د ملاتړ په اړه د اروپايي ټولنې د اعلامیې هر کلی کوي.
په اعلامیه کې راغلي دي: "د افغانستان دولت په دې باور دی چې د افغان حکومت او اروپايي ټولنې ستراتیژيک روابط د ګډو ارزښتونو د پایښت او د ګډو ګواښونو سره د مبارزې په برخه کې پر خپل ځای پاتې شي."
اروپايي ټولنې ټولنې تېره ورځ (غبرګولی ۹/مې ۲۹) په یوې اعلامیې کې د بین الافغاني مذاکراتو د پیلېدو غوښتنه کړې او د تېرو دوو لسیزو د لاسته راوړنو په ساتلو یې تاکید کړی دی.
اعلامیې په افغانستان کې د تل پاتې اوربند غوښتنه کړې او افغانستان سره یې خپلې مرستې مشروطې کړي: " د دې لپاره چې اروپايي ټولنه افغانستان کې د دموکراټیک او جمهوري نظام اصول وساتل شي، خپلې مرستې مشروطوي."
اروپایي ټولنې له طالبانو څخه هم غوښتي دي چې د دوحې تړون ته درناوی وکړي او د سولې خبرو ته کېني. دغې ټولنې د طالبانو وروستي بریدونه هم غندلي او له ټولو ډلو یې غوښتي چې د دې فرصت نه د سولې لپاره ګټه پورته کړي.
په اعلامیه کې راغلي چې افغان حکومت او ارپايي ټولنې په تیرو دوو لیسزو کې د تروریزم پر ضد مبارزه کړې ده او په دې برخه کې زیاتې قربانۍ ورکړي دي، چې افغانستان بیا د تروریستانو په خوندي مرکزونو بدل نشي.
طالبانو د افغانستان د سولې پروسې څخه د اروپایي ټولنې ملاتړ ستایلی دی خو وايي چې د دغې ټولنې د اعلامیې له ځینو ټکو سره مخالفت دي.
طالبانو په یوې اعلامیې کې ویلي دي چې د سولې تړون پر بنسټ د امریکا متحدین باید د افغانستان کورنیو چارو کې مداخله ونه کړي.
