د افغانستان دفاع وزارت وايي په کندز ولایت کې د طالبانو لخوا د توغول شوي هاوان لګېدو له امله پنځه ملکي وګړي وژل شوي او اووه نور ټپیان شوي دي.
دفاع وزارت ویلي چې دغه پېښه نن دوشنبه اکتوبر۱۲(تلې۲۱) د کندز ښار «شورابي قشلاق» سیمه کې شوې ده.
د افغانستان دفاع وزارت په اعلامیه کې راغلي چې په وژل شویو کسانو کې ښځې او ماشومان شامل دي.
بیان وایي چې په ټپیانو کې د ماشومانو په ګډون د پاخه عمر نارینه هم شامل دي. وسله والو طالبانو تر دا مهاله په دې اړه تبصره نه ده کړې.
په کندز ولایت کې پر داسې مهال د ملکي مرګ ژوبلې په اړه خبر ورکول کیږي چې په دې وروستیو کي د چارواکو په وینا د هیواد ځینو ولایتونو کې جګړو زور اخیستی دی.
د یادو ولایتونو له ډلې یو هم هلمند دی چې له تېرو دوو شپو پکې د افغان سرتیرو او طالبانو ترمنځ درنه جګړه روانه ده.
د جګړې له امله لویې لارې تړل شوي او ګڼې کورنۍ د خپلو سیمو پرېښودو ته اړیستل شوي دي.
د افغانستان د کورنیو چارو وزارت د هلمند په جګړه کې د ۸۰ طالبانو د وژل کېدو او لسګونو نورو د ټپي کېد خبر ورکړی دی.
طالبانو تر دا مهاله د هلمند د جګړې په اړه تبصره نه ده کړې.