د روژې د میاشتې د رارسیدو سره جوخت د کابل ښار او ولایتونو یو شمیر اوسیدونکې وايی چې د خوراکي توکیو بیې یو ځل بیا لوړې شوي او زیات شمیر کورنۍ د اړتیا وړ توکیو د اخیستلو توان نلري.
د کابل ښار یو اوسیدونکي عبدالحمید، د اپریل په لومړۍ ورځ (وري ۲۱) امریکاغږ ته وویل خلک په بازارونو کې د روژې لپاره د اړتیا وړ توکیو په اخیستلو بوخت دي، خو دکانداران او سوداګر د لومړنیو توکیو بیې لوړې کړې دي.
هغه ادعا وکړه چې سوداګر او پلورونکي تل د روژې میاشتې په درشل کې د خوراکي توکیو بیې لوړوي او مسول بنسټونه ندي تواندیلي چې د هغوی ددې کار مخنیوی وکړي.
هغه زیاته کړه: "پدې وروستیو اونیو کې د خوراکي توکیو بیې تر یوه حده راټیټې شوی وې، خو اوس روژې ته کمې ورځې پاته دي بیې بیرته لوړې شوي، د مثال په توګه یوه بوجۍ لومړۍ درجه اوړه څه دپاسه ۲۵۰۰ افغانیو ته رسیدلي دي او ښایي نور هم لوړ شي."
د کابل ښار یو بل اوسیدونکي فریدون،له طالبانو وغوښتل چې په کابل او نورو ولایتونو کې په بازارونو کې د ګرانۍ مخه ونیسي او د اولیه خوراکي توکیو لپاره نرخونه وټاکي.
هغه وویل چې د طالبانو په واکمن کیدو سره زیات شمیر خلکو خپلې دندې له لاسه ورکړي او اوس هغوی د خپلو ورځنیو اړتیاو د اخیستلو توان نلري.
د کابل یو شمیر هټۍ وال د لومړنیو خوراکي توکیو د بیو لوړیدل مني خو ټینګار کوي چې ددې موادو نرخونه په مجموعي توګه لوړ شوي او دوی هم دا مواد په لوړه بیه اخلي.
پدې ترڅ کې د کابل ښاروالۍ ویلي چې د نرخونود لوړیدو د مخنیوي لپاره یې اقدامات پیل کړي او د څه مودې راهیسې یې دکاندارانو ته نرخ نامې ورکړې دي.
د کابل ښاروالۍ ویاند عبیدالله بارکزي امریکاغږ ته وویل: "د کابل ښاروالي د یوې نیمې میاشتې راپدیخوا په کابل ښار کې نرخنامه توزیع کوي او دا نرخنامې سل په سلو کې د تطبیق وړ دي. پدې اړه مختلف بنسټونه له مونږ سره همکار دي."
ښاغلي بارکزي زیاته کړه چې سږکال به د نورو کلونو په پرتله د روژې په میاشت کې د لومړنیو توکیو نرخونه ښه وي او هغوی به د ګران خرڅوونکو او "پر خلکو د ظلم" مخه ونیسي.
