تاسو به حتمآ د چرګې هکۍ په ګرمو اوبو کې جوش کړې وي، خو ایا د هګیو سپین او ژېړ ستاسو په خوښه اېشېدلي او که سپین یې نیم خام او ژېړ یې کلک راغلي؟
څېړونکي وايي چې له ډېرو تجربو وروسته یې د هګیو د اېشېدو سمه طریقه موندلې چې په کې د هګیو سپین مخملي او ژېړ یې نرم او نیمه جامد جوش کېږي.
د هګیو په جوش کېدو کې د سپین او ژېړ د ښه جوش کولو لپاره توازن ساتل سخت کار بلل کېده، ځکه چې د هګیو ژېړ د سپین په پرتله په کم حرارت کې پخېږي. که یوه هګۍ په عادي توګه او په همدې اندازه حرارت کې واېشل شي، ډېر کله یې ژېړ کلک راځي او که په کم حرارت کې واېشل شي، بیا یې سپین نیم جامد او کلک راځي.
سایسنپوهان وايي چې د ریاضي له معادلاتو څخه یې په کار اخیستو سلګونه هګۍ جوش کړې چې دا معما حل کړي. په یوې معادلي کې د هګۍ د کلک پوټکي او د هکۍ په منځ کې د نرمۍ ترمنځ د حرارت د انتقال څرنګوالی ازمایل شوی. په بلې معادلې کې له مایع حالت څخه جامد او جیل ته ورته د هګیو د موادو د تبدیل څرنګوالی ثبت شوی دی.
د هګیو د جوش کولو وروستۍ طریقه له یو کوچني چلوصاف څخه دوو جلا کاسو ته د هګیو انتقال دی- دا کار باید په هر دوو دقیقو کې ۳۲ ځلې تکرار شي، داسې چې په یوې کاسې کې ګرمې اوبه وې او په بلې کې ۳۰ درجې سانتي ګراد کې اوبه وي. دا کار باید ۳۲ ځلې انجام شي او بیا هګۍ د نل تر اوبو لاندې ونیول شي او سپینه کړل شي.
د کالیفورنیا پوهنتون محقق ګریګوري وییس په دغه تحقیق کې شامل و، هغه وايي: «تاسو له شک پرته چې دا کار د لږ تر لږه یو درجن هګیو سره کولای شي.»
د ناپلس دویم د فیدیریکو پوهنتون څخه ایمیلیا ډي لورینزو وویل: «ساینسپوهانو چې کومه طریقه وړاندې کړې، په هغې د هګیو تر پوره جوش کېدو پورې په متفاوت ډول د هګیو پخول، ګرم کول او یخ کول شامل دي. په دې کې د هګیو ژېړ په ثابت حرارت کې کلک پاتې کېږي او کله چې بیا پخیږي او کریمي حالت غوره کوي، تاسو کولای شی د (کچ په څېر) یې د خپلې ډوډۍ د پاسه واچوئ.»
د دې لپاره چې محققان تائید کړي یوه نوې طریقه یې موندلې، د چرګې د هګۍ اماده شوي کیمیايي ترکیب یې وازمایه او په دودیز ډول یې د پخو شویو هګیو سره یې یو ځای د اتو کسانو مخې ته کېښودل چې ویې خوري او تائید یې کړي.
دا څېړنه د پنجشنبې په ورځ فبروري شپږمه (سلواغه ۱۸) د «کمیونېکېشن انجنیرنګ» په ژورنال کې خپره شوه. د منیسوتا پوهنتون جووان سلاوین چې په دغې څېړنې کې یې برخه اخیستې، وایي چې دا نوې طریقه په دې مانا ده چې باید په اشپز خانې کې ډېر وخت تېر کړئ او اېشول کېدونکې هګۍ په یو لوښي کې همداسې پرېنږدي. هغه وايي دا ورو بهیر دی خو نتیجه یې غوره ده.
فورم \ دبحث خونه