د افغانستان لپاره د امریکا نوی ټاکل شوی شارزدافیر راس ویلسن وايي د ټاکنو او سولې اړوند مسایل یې د کار لمړیتوبونه دي.
ښاغلی ویلسن چې تازه د افغانستان لپاره د امریکا متحده ایالاتو د شارزدافیر په توګه ټاکل شوی د نوي سفیر تر ټاکل کېدو پوري به د سرپرست سفیر دنده هم تر سره کوي.
نوموړي د شنبې په ورځ د «جنورۍ پر ۱۸مه» پر خپل ټوېټر لیکلي، چې د افغانستان د تاریخ په یو مهم پړاو کې پر یادې دندې ټاکل شوی دی.
هغه زیاته کړې چې د دغه هیواد ټاکنې د سولې بهیر او د افغانانو راتلونکی انتخاب یې له کاري لومړیتوبونو څخه وي.
هغه ویلي:"خوښ یم چې د افغانستان په دې تاریخي او مهم پړاو کې په کابل کې د امریکا په سفارت کې کار پیلوم. زه او زما هیواد د افغانستان د ټاکنو پروسې په شمول، له سولې او د افغانستان له ټولو هغو لومړیتوبونو ملاتړ کوي چې ویاړلو افغانانو د خپل راتلونکي لپاره انتخاب کړي."
تر ویلسن مخکې جانبس په کابل کې د امریکا د سفیر په توګه دنده تر سره کول، چې تېره میاشت له دندې څخه لیري شو.
د افغان ولسمشر محمد اشرف غني ارشد سلاکار فضل فضلي د امریکا نوي شارزدافیر ته د ښه راغلاست ترڅنګ د افغان حکومت لخوا د نژدې همکارۍ ډاډ ورکړی دی.
هغه پر خپل ټوېټر لیکلي: "ښاغلی ویلسن ښه راغلاست درته وایو او تاسو سره د دوه اړخیزو مسایلو او د سولې پروسې په شمول نورو مهم مسلو باندې له نږدې کار کولو ته سترګې په لار یو."
جانس بس په ۲۰۱۷ کې د افغانستان لپاره د متحدو ایالتونو سفیر وټاکل شو. د هغه د ماموریت پر مهال له طالبانو سره د امریکا مخامخ خبرې پيل شوې، په افغانستان کې موقت اوربند وشو او همدغه راز د ولسمشرۍ او پارلماني ټاکنې هم وشوې.
راس ویلسن د امریکا د بهرنیو چارو په وزارت کې له شاوخوا دریو لسیزو راهېسې کار کوي، هغه په ترکیې او آذربایجان کې د امریکا سفیره هم وه.
ښاغلي ویلسن د دې ترڅنګ په مسکو، پراګ او اسټرالیا کې د امریکا په سفارت کې د جنرال کونسل په توګه دنده هم تر سره کړې ده.
پر همدې مهال په کابل کې د جرمني سفارت هم پر خپل ټوېټر لیکلي چې د افغانستان لپاره د جرمني ځانګړي استازي مارکس پوتزیل کابل ته د سفر پرمهال له افغان سیاسیونو سره لیدنه کې د افغان سولې په اړه د راتلونکي بین الافغاني غونډې د طرحې په اړه خبرې کړي دي.
تېر کال په دوحه کې د جرمني او قطر په کوربتوب د افغان سولې په اړه بین الافغاني غونډه تر سره شوه.
