د طالبانو له خوا د اختر په دریو ورځو کې د اوربند اعلان پریکړه نه یوازې په کور دننه د خلکو د پراخ هرکلي سره مخ شوې، بلکې په نړیواله کچه هم د طالبانو دا پریکړه ستایل شوې ده.
د امریکا د بهرنیو چارو وزیر مایک پمپیو د افغان حکومت او طالبانو ترمنځ د اوربند د ټینګیدو هرکلی کړی دی.
ښاغلي پمپیو د خپل ټویټر په پاڼه د یکشنبې د ورځې ناوخته لیکلي " زه د طالبانو او د افغان حکومت ترمنځ د اختر په دریو ورځو کې د اوربند د ټینګیدو هرکلی کوم. دا افغانانو ته یو ډیر لوی فرصت ورکوي، چې نور خنډونه لرې او د بین الافغاني خبرو په لور حرکت وکړي، چې جګړه پای ته ورسوي".
د افغانستان د پخلاینې لپاره د امریکا ځانګړي استازي زلمي خلیلزاد د اوربند د ټینګیدو څخه هرکلی کړی او ویلي دي، چې د امریکا د متحده ایالاتو او د طالبانو ترمنځ د بندیانو تبادله،د بین الافغاني خبرو لپاره د نیټې ټاکل او د تاوتریخوالي لوړې کچې ته بیرته د نه ستنیدلو په برخو کې دې نور ګامونه هم پورته شي.
سفیر خیلیزاد هم په ټینګار ویلي، چې باید دا فرصت له لاسه ونه وځي.
د شمالي اتلانیک د سازمان ناتو عمومي منشي ینس سټولټنبرګ د یکشنبې په ورځ د خپل ټویټر په پاڼه د اوربند هرکلی کړی دی او ویلي دي، چې دواړه غاړې باید ددغه فرصت څخه ګټه پورته کړي.
افغانستان کې د امریکايي ځواکونو ویاند سوني لیګیټ د ټولو ښکیلو غاړو غوښتي، چې د تاروتریخوالي د کچې په ټیټیدو سره دې پریږي، چې د سولې بهیر پرمخ لاړ شي.
جرمني، اندونیزیا، ناروې، قطر او ازبکستان هم په یوه ګډه اعلامیه کې د اختر په ورځو شپو کې د اوربند د ټینګیدو هرکلی کړی دی.
د جرمني د بهرنیو چارو وزارت د خپل ټویټر پاڼه لیکلي، چې د دغه هیواد د بهرنیو چارو وزیر هایکو ماس، د اندونیزیا، ناروې، قطر او ازبکستان د بهرنیو چارو د وزیرانو سره په ګډه د افغان حکومت او د طالبانو ترمنځ د اعلان شوي اوربند هرکلی کوي.
دا اعلامیه وايي " افغانان خپل هیواد کې د تاروتریخوالي پای ته رسیدلو او د سولې او ثبات د ټینګیدلو مستحق دي او مونږ ښکیلو غاړو سره مرستې ته په هر ډول، چې هغوې یې غواړي چمتو یو".
دغو پنځو هیوادونو د افغان حکومت او طالبانو ترمنځ د بین الافغاني خبرو د کوربتوب لپاره له وړاندې چمتوالی ښودلی وو.
د دغو هیوادونو په ګډه اعلامیه کې د کرونا د ویروس د وبا سره د مبارزې لپاره په افغانستان کې د بشري اوربند د ټینګیدو لپاره د نړیوال وړاندیز یادونه کړې او د ښکیلو غاړو څخه یې د دغې وبا سره د مبارزې لپاره د تل پاتې تاوتریخوالي د کمیدو غوښتنه کړې ده.
طالبانو د اختر په لومړۍ ورځ د درې ورځيني اوربند اعلان کړی دی.
جمهور رئیس محمد اشرف غني د طالبانو اقدام ستایلی او ویلي دي، چې افغان امنیتي ځواکونه به په کلکه اوربند ته پابند پاتې شي او افغان ځواکونه به د اوربند په موده کې په دفاعي حالت کې پاتې شی.