د ایران د عامې روغتیا وزارت مرستیال علي رضا رئیسي د دوشنبې په ورځ فبرورۍ ۱۷ (سلواغه ۲۹) ایران ته خبرداری ورکړ چې له پاکستان او افغانستان څخه به د پولیو ویروس ورانتقال شي.
پاکستان او افغانستان دا مهال په نړۍ کې دوه هغه هېوادونه دي، چې لا هم د پولیو ویروس په کې ژوندی دی او یو شمېر ماشومان پرې اخته شوي دي. په پاکستان کې تېرکال (۲۰۲۴) ۷۳ ماشومان په دغه ویروس اخته شوي او په افغانستان کې بیا د پولیو ۲۵ پېښې ثبتې شوې وې.
رئیسي په پاکستان او افغانستان کې همدغو پېښو ته په کتو وویل: «ایران د ګوزڼ د دوو اصلي هېوادونو (پاکستان او افغانستان) په منځ کې دی او د رسمي او غیر رسمي تګ راتګ له کبله د دغه ویروس له جدي او دوامداره خطر سره مخامخ دي.»
نوموړي په پاکستان او افغانستان کې د پولیو د پېښو زیاتوالي ته په کتو په ایران کې د وقایوي کمپاین او عملیاتو د پیل کېدو خبره وکړه او ضروري یې وګڼله.
هغه وویل: «دا عملیات (کمپاین) به په یوې میاشتې کې دننه د پولیو له پلوه په خطرناکو سیمو کې په دوو مرحلو کې کور په کور کېږي او تر پنځو کالونو کم عمر ایراني او غیر ایراني ماشومانو ته به د پولیو د واکسین څاڅکي ورکول کېږي.»
ملګرو ملتونو تېره اونۍ وویل چې افغانستان کې تېرکال د پولیو دومره پېښې ثبتې شوې، چې په تېرو څلورو کلونو کې نه وې شوې، په همدې حال کې د طالبانو حکومت همدا تېر کال دوه ځلې د پولیو واکسین کمپاین وځنډوه.
د ملګرو ملتونو په راپور کې ویل شوي دي، چې طالبانو د پولیو واکسین کوونکو ته سپارښتنه کړې وه، چې د کور په کور د ګرځېدو په ځای، ماشومانو په جوماتونو کې واکسین کړي.
په دغه راپور کې راغلي: «له دې وروسته به واکسین کوونکي ونه شي کولای چې کور په کور د پولیو واکسین وکړي، احتمال لري چې دا ځنډ او تغیر په افغانستان کې د پولیو د کمپاین د تطبیق په څرنګوالي او په دغه هېواد کې د پولیو د مثبتو پېښو په زیاتوالي کې ونډه ولري.»
د روغتیا نړیوال سازمان وايي چې کور په کور کمپاین یوه ښه او د دغه ویروس له خطر سره مخامخو ماشومانو ته د واکسین کولو لپاره غوره ګڼي.
دا مطلب د ایرنا او یوناما د راپورونو په اساس لیکل شوی.
فورم \ دبحث خونه