په کندهار کې په نشه روږدي کسان وايې چې که ورته د درملنې امکانات برابر شي نو چمتو دي چې له نشو لاس واخلي.
په نشه روږدي دا کسان د تودې هوا له کبله له ګڼو ستونزو سره مخ دي.
دوی په ټکنده غرمه د واټونو پر سر ګرځي چې ځيني ناروغۍ هم ورته پيدا شوي. دوی د درملنې لپاره د امکاناتو غوښتنه کوي.
یو شمیر په نشه روږدي کسان وایي چي د کورنۍ مسئولیتونه يې هم تر غاړي دي خو دوی یوازي د ځان لپاره د نشه يي موادو د پيدا کیدو لپاره ورځ سبا کوي او کورنۍ ورڅخه پاته دي.
دغه شخص وايې چې له څه باندي یوې لسیزي را هیسي په نشه اخته شوی، خو اوس د درملنې لپاره د امکاناتو د پیدا کیدو په فکر کې دی.
په نشه د روږدو کسانو د شمېر زیات والي د کندهار ولایتي شورا هم اندېښمنه کړې.
د ولایتي شورا رئیس سیدجان خاکریزوال وايې چې د معتادینو د درملنې لپاره دي په کندهار کې امکانات زیات شي، خو هغه دا هم وایي چې په نشه د روږدو کسانو په درملنه کې د ټولنې د ټولو خواو همکاري اړینه ده.
د عامي روغتیا وزارت له لوري دا مهال په کندهار کې په نشه د روږدو کسانو د درملنې لپاره یو روغتون فعالیت لري چي په هرو دو میاشتو کې یوازي په کې د سل تنو درملنه کیږي.
دا پداسې حال کې دي چې پدې ولایت کې په نشه د روږدو کسانو شمېر د چارواکو د اټکل له مخې له ١٠٠ زرو تنو زیات دی.
