د کندهار والي حیات الله حیات تائید کړه چې د کرونا په ناروغۍ اخته شوی دی.
حیات الله حیات نن شنبه مې۹(غويي۲۰) امریکا غږ سره په مرکه کې وويل چې دا مهال د کندهار ولایت مقام د حرم سرای په برخه کې قرنطین دی او له هغه ځایه د ولایت چاري مخ ته وړي.
ښاغلي حیات زیاته کړه چې تیره ورځ يې د کرونا ويروس نمونه د جنوبي حوزې د کرونا طبي لابراتوار ته سپارلې وه چې تېره شپه يې نتېجه مثبته ثابته شوې.
ده وويل:"متاسفانه کوم سمپل چې ما لابراتوار ته لیږلی و نتېجه يې مثبته وه، زه تر هغو چې د کرونا ناروغۍ پايله مي بیرته منفي شوې نه وي مخامخ له چا سره نه وینم خو د ولایت چاري به چې د خلکو خدمت تر هرڅه لومړیتوب راته لري له حرم سرای څخه سمبالوم."
پر همدې مهال د کندهار والي مطبوعاتي دفتر وايي چې والي ته د نږدې کسانو په شمول چي سکرټران او ساتونکې يې پکښې شامل دي د څو کسانو سپملونه هم د معایناتو لپاره اخیستل شوي.
د کندهار دوالي ویاند بهیر احمدي امریکا غږ ته وويل چې د دغو کسانو شمېر تر لسو تنو زیات دی او پدې کې د کندهار ولایت مقام دوه مرستیالان نه دي شامل.
ده وويل:"د والي صاحب سره په نږدې تماس کې د څو کسانو چې شمېر يې تر لسو زیات دی هم نمونه اخیستل شوې او د لابراتور معایناتو ته منتظر یو خو د والي صاحب دوه مرستیالان روغ رمټ دي او هغوی پدې کې ندي شامل."
په ورته وخت کې د کندهار ولایت مقام ته د تلوونکو کسانو پر ورتګ هم محدودیتونه وضح شوي دي.
ښاغلی احمدي په دې اړه وايي چې په ولایت مقام کې له وړاندې لا د فاصلې مراعت کیدو ته ډير پام کېده او هغه ریسان چې د اونیزو او اداري مجلسونو لپاره ولایت مقام ته ورتلل دې ټکي ته ډير پام کاوه.
دغه راز د کندهار ولایت مقام وايي چې ولایت ته د ورتلونکو کسانو او مراجعینو د کارونو د تر سره کیدو لپاره د ډيجټلي سیستم پر رامنځ ته کیدو کار پيل شوی چې والي به د ویډيو کنفرانس له لارې د هغوی کارونه اجرا کوي.
په کندهار کې تر د امهال د کروناویروس ټولې ۴۸۱ مثبتي پېښي ثبت شوي چې ۳۰ تنه يې ډاکتران او پاته نور يې د ټولنې د بیلا بیلو برخو غړي دي.
دا په افغانستان کې درېیم لوړپوړی چارواکی دی چې په کرونا ویروس اخته کیږي.
د تیرې پنجشنبې په ماښام د افغانستان روغتیا وزارت خبر ورکړ چې د روغتیا وزیر ډاکټر فیروز الدین فیروز هم په کرونا ویرس اخته شوی او دا مهال په خپل کور کې قرنطین دی.
تر هغه مخکې په ټولنیزو چارو کې د کابل والي مرستیاله حنیفه ګیرووال هم په کرونا ویروس اخته شوې وه.
