د مراکش پاچا له خپل ولس څخه غوښتي دي، چې په لوی اختر کې قرباني ونه وکړي، ځکه چې د هغه په خبره وچکالۍ په دغه هېواد کې څاروي کم کړي او غوښه قیمته شوې ده.
د مراکش یو مقام د دغه هېواد د پاچا محمد السادس پيغام ولوسته چې د مراکش د ملي تلویزون له لارې خپور شو. په پيغام کې راغلي دی: «هېواد مو له اقتصادي او اقلیمي ستونزو سره مخامخ دی او څاروي یې پام وړ کم کړي دي.»
هغه ویلي دي چې د لوی اختر مراسم خپل ارزښت لري خو له خلکو یې وغوښتل چې قرباني ونه کړي.
مسلمانان هر کال په لوی اختر کې میلیونونه پسونه، اوزې، غويي او اوښان قرباني کوي.
خو په مراکش کې، چې له تېرو اوو مسلسلو کالونو راهېسې په کې وچکالي ده، په تېرو ۱۲ میاشتو کې په کې څاروي ۳۸ سلنه کم شوي دي.
د مراکش د کرنې وزارت د معلوماتو په اساس په دغه هېواد کې باران د تېرو ۳۰ کالونو په نسبت ۵۳ فیصده کم شوی دی.
په ۱۹۶۶ کې هم مراکش کې له سختې وچکالۍ سره مخامخ شوی و، هغه وخت هم ددغه هېواد پاچا حسن الثاني، چې د محمد السادس پلار و، له خلکو غوښتي وو چې په لوی اختر کې قرباني ونه کړي.
په مراکش کې د وچکالۍ له کبله غوښه قیمته شوې ده او د هغو کورنیو لپاره، چې عاید یې کم دي، د غوښې اخیستل ستونزمن کړي دي.
فورم \ دبحث خونه