په کندهار کې د هغه ونو چې ژر مېوه ورکوي، تر دوه سوه زیات نوي باغونه جوړ شوي.
په دغو باغونو کې تر ډېره هغه کاریګر کار کوي چې پخوا یې د تریاکو په پټیو کې نېښګري او نور کارونه کارول.
شاوخوا څلور کاله مخکې دا ځمکه شاړه پرته وه، خو اوس پر دغه ځمکه د مېوې ونې حاصل ته رسېدلي.
په کندهار کې ورځ تر بلې د نویو باغونو کېښنول ډېریږي او باغوانان یې تمه لري چې ښه حاصلات به ورکړي.
باغوانان وايي که حکومت د نیالګیو، اوبو او سړو خونو په برخه کې مرسته وکړي، نو له نویو باغونو سره به نه یوازې د دوی اقتصاد ښه شي، بلکې ډېرو نورو کسانو ته به هم د کار زمینه برابره شي.
د نویو باغونو په پالنه کې تر ډېره هغو کسانو ته هم د کار زمینه برابره شوې چې مخکې به یې د نشه يي توکو حاصلات راټولول.
عبدالسلام د اوږدې مودې لپاره د تریاکو په پټیو کې کار کړی خو اوس د ګرینګیچو په دې باغ کې په روزانه مزدوري بوخت دی.
هغه وايي "پخوا مو د تریاکو کار کوی اوس دلته کار کوو، انبار ورکوو، میوې راټولوو".
کندهار توده هوا لري چې له امله یې ځینې مېوې ژر حاصل ورکوي، د دې ولایت د کرنې مسئولین وايي چې په دې وروستیو کې په کندهار کې تر دوه سوه زیات د هغه مېوو چې ژر حاصل ته رسیږي، باغونه جوړ شوي دي.