د ناسا نوی فضايي ټیلسکوپ د سې شنبې په ورځ مارچ ۱۱ د ځمکې مدار ته ورسید چې د ټول اسمان داسې نقشه واخلي چې دمخه یې ساری نه و لیدل شوی. دا به د پیدایښت راهیسې د سلګونو میلیون کهکشانونو او د دوی مشترکې فضا یوه پراخه کتنه وي.
سپیس ایکس د کلیفورنیا ایالت څخه د سپیریکس په نامه رصدخانه فضا ته واستوله او د ځمکې د قطبونو پر سر یې الوتنې ته دوام ورکړ. پدې څارنه کې د لمر د مطالعې لپاره د څلورو بکسونو په اندازه یوه سپوږمکۍ هم شامله ده. فضا ته د توغولو وروسته سپیریکس لومړی د لیږدونکي راکټ له پورتنۍ برخې څخه جلا او تیاره فضا کې پداسې حال کې ورډوبه شوه چې ترې لاندې نیلي ځمکه ښکاریده.
د ۴۸۸ میلیون ډالرو په ارزښت د سپیریکس څارونکې د ماموریت موخه دا ده چې وڅیړي کهکشانونه څنګه په میلیاردونو کلونو کې رامینځته او تکمیل شوي او کاینات په خپلو لومړیو شیبو کې څنګه دومره ګړندي پراخ شوي.
زموږ په خپل شین اسمان کې د شیدو لارې په نامه کهکشان کې به سپیریکس د ستورو ترمنځ په کنګل شوي ورېځو کې د اوبو او د ژوند څرک اجزاوې ولټوي چیرې چې نوي لمریز سیسټمونه راڅرګندیږي.
مخروطي شکل لرونکی سپیریکس - چې ۵۰۰ کیلوګرامه وزن لري او د یوې لوی پیانو په اندازه دی، شپږ میاشتې وخت به ونیسي چې د خپلوسره رنګه سترګو او د لید په پراخې ساحې سره ټول اسمان نقشه کړي. د دوو کلونو په اوږدو کې د اسمان څلور بشپړه سروې پلان شوي، پداسې حال کې چې ټیلسکوپ به د ځمکې پر شاوخوا له یو قطب څخه تر بل قطب پورې ۶۵۰ کیلومتره پورته څرخي.
سپیریکس به د ناسا د لویو او ډیرو پراخو هبل او ویب فضايي ټیلسکوپونو په څیر چې هغوی د لید تنګه ساحه لري، کهکشانونه په دقیقه توګه ونه ګوري.
د کهکشانونو د شمیرلو یا په هغوی تمرکز کولو پرځای به سپیریکس د ټول کهکشان تولید شوي موجودات وګوري، چې په کې د هغو لومړنیو شیانو کتنه شامله ده چې د کایناتو د رامینځته کیدو په ترڅ کې رامینځته شوي.
ناسا د ټول اسمان او ملیونونو کهکشانونو د نقشې اخیستلو لپاره فضا ته نوی ټیلسکوپ واستوه
فورم \ دبحث خونه