د ناټو عمومي سرمنشي ینس سټولټبرګ وايي، دوی «د افغانستان د ستونزې د هواري لپاره» د افغانانو په مشرۍ د سیاسي توافق او سولې پر پروسې باور لري، خو وايي، د سیمې هېوادونو په ګډون له روسیې او ایران څخه هم تمه لري چې د افغانانو په مشرۍ د سولې له بهیر څخه ملاتړ وکړي.
ښاغلي سټولټنبرګ چې د سې شنبې په ورځ د« لېندۍ پر ۱۳مه» یې په بروکسل کې د ناټو د بهرنیو چارو وزیرانو د غونډې په اړه خبرې کولې خبریالانو ته وویل چې ناټو او غړي هېوادونه یې د افغانانو په مشرۍ د سولې له بهیر څخه ملاتړ کوي.
نوموړي زیاته کړه چې ناټو له افغان سرتېرو سره د ښوونو، مشورو او مرستې له لارې هڅه کوي چې د افغانستان د سولې لپاره «یو سیاسي حل لاره» پیدا کړي.
هغه زیاته کړه:
"موږ طالبانو ته واضح پیغام لېږو، چې هغوی به په جګړه کې هېڅ کله هم بریالي نشي، نو باید د سولې په اړه د خبرو اترو مېز ته کېني، او د سولې د واقعي مذاکراتو له لارې له دولت سره یو ځای شي، موږ د روسیې او ایران په ګډون له ټولو سیمه ییزو قوتونو څخه تمه لرو چې د افغانانو په مشرۍ د سولې له پروسې څخه ملاتړ وکړي او په دې برخه کې خپل اغېز لرونکی رول ادا کړي."
نوموړي له طالبانو سره د سولې په اړه د ناټو د سرو کرښو په اړه د خبریالانو د یوې پوښتنې په ځواب کې وویل چې، «د سرو کرښو رسمول» د ناټو مسؤلیت نه بلکې دا د هغو کسانو کار دی چې د هغه پر وینا د سولې خبرې پر مخ بیايي.
هغه زیاته کړه چې په افغانستان کې د شوو پرمختګونو په ځانګړي ډول د ښځو د حقوقو او خلکو شموله ستاینه کوي او وايي په افغانستان کې له ډموکراټیک بهیر څخه ملاتړ ته به دوام ورکړي.
نوموړي تېره ورځ هم د ناټو د غړو هېوادونو د بهرنیو چارو وزیرانو د غونډې د اجنډا په ناسته کې خبریالانو وویل چې ناټو د افغانانو د امنیت او ساتنې په خاطر په افغانستان کې پاتې کېږي او نه غواړي چې دغه هېواد یو ځل بیا د تروریستانو په خوندي ځای بدل شي.
د بجلیم مرکز بروکسل کې د ناټو د بهرنیو چارو وزیرانو غونډه د سې شنې په ورځ «د لېندۍ پر ۱۳مه» پیل شوه.
ټاکل شوې په دغه دوه ورځنۍ غونډه کې په افغانستان کې پر موجوده ستونزو باندې هم خبرې وشي.
د ناټو مطبوعاتي دفتر ویلي چې ددغه سازمان غړو په افغانستان کې زیات تلفات زغملي او وايي هېڅ کله اجازه نه ورکوي چې افغانستان د تروریستانو په امن ځای بدل شي.
په دغه ناسته کې د افغانستان په استازیتوب د بهرنیو چارو وزیر صلاح الدین رباني هم ګدون کوي.
