د افغانستان د عامې روغتیا وزارت د معلوماتو په اساس په تېرو ۲۴ ساعتونو کې په ټول هیواد کې د کرونا ویرس ۱۳۲ مثبتې پېښې ثبت شوي او پنځه تنه مړه شوي دي.
روغتیا وزارت نن دوشنبه نومبر دوهمه (لړم ۱۲) ویلي چې په تېره شپه او ورځ کې د کرونا ویروس د ۴۵۳ مشکوکو سمپلونو معاینات شوي چې ۱۳۲ یې مثبت وو.
د یاد وزارت د معلوماتو په اساس په دې سره په افغانستان کې د کرونا ویروس د مثبتو پېښو شمېر ۴۱۶۳۳ ته پورته شو.
همدارنګه په تېرو ۲۴ ساعتونو کې د کرونا ویروس له امله ۵ تنه مړه شوي چې په دې سره د ټولو مړو شوو کسانو شمېر۱۵۴۱تنو ته ورسید.
د رسمي شمیرو له مخې تر دا مهاله ۳۴۳۴۲ تنه بیرته کرونا ویروس څخه جوړ شوي دي.
کرونا ویروس د لومړي ځل لپاره د ۲۰۱۹ کال په دسمبر میاشت کې د چین د هوبي ایالت په ووهان ښار کې پيدا شو، ډیر ژر په وبا واوښت او ټولې نړۍ ته خپور شو.
د امریکا د جانس هاپګینز پوهنتون د معلوماتو له مخې تر دا مهاله په نړۍ کې څه باندې ۴۵ میلیون کسان په کرونا ویروس اخته شوي او شاوخوا یو میلیون نور کسان د دغه ویروس له کبله مړه شوي.
