د افغانستان د عامې روغتیا وزارت د چهارشنبې په ورځ ( غبرګولي ۸مه) په یوه اعلامیه کې ویلي، چې د ماشومانو د ګوزڼ یا پولیو یوه مثبته پيښه یې د کونړ ولایت د وټپور په ولسوالۍ کې تازه ثبت کړې، چې ورسره په روان میلادي ۲۰۱۹ کال کې د پولیو د پيښو شمیر اتو ته لوړ شوی دی.
د عامې روغتیا وزارت ویاند ډاکټر وحیدالله مایار د خپل ټویټر په پاڼه په وټپور ولسوالۍ کې د پولیو مثبته پیښه تائید کړې او ویلي دي، چې په دغه ولسوالۍ کې یو درې میاشتنی ماشوم د دغې ناروغۍ له امله فلج شوی دی.
ډاکټر مایار ویلي" په واټپور ولسوالۍ کې ګڼې سیمې د پولیو واکسین دکمپانونو له لاسرسي څخه بهر دي او شاوخوا ۸۵ سلنه د هدف وړ ماشومان په تیر کمپاین کې چې د اپریل په میاشت کې پلي شو، د لاسرسي وړ نه وه".
د عامې روغتیا وزارت د معلوماتو له مخې تیره میاشت په دغه ولایت کې د ۹۸۲۱ ماشومانو له جملې څخه، ۸۵۰۰ ماشومان د پولیو د واکسین څخه پاتې شوي وو.
د عامې روغتیا وزارت وايي، په روان ۲۰۱۹ میلادي کال کې تراوسه د ماشومانو د ګوزڼ یا پولیو ټولې اته پیښې ثبت شوي دي.
د دغو پیښو شپږ یې په جنوبي ولایتونو کې ثبت شوي دي.
په نړۍ کې په درې هیوادونو کې، چې افغانستان، پاکستان او نایجریا په کې شامل دي اوس هم ماشومان د پولیو د ویروس ګواښ سره مخ دي.
تیر ۲۰۱۸ میلادي کال کې په افغانستان کې د پولیو ۲۱ پیښې ثبت شوې وې.
د تیرکال په څیر سږکال هم تراوسه په افغانستان کې د پولیو ډیرې بيښې پاکستان سره په سرحدي ولایتونو کې ثبت شوي دي.