پاکستان شنبه جنوري ۲۷ (سلواغې اوومه) تائید کړه چې وسله والو په ایرن کې نهه پاکستاني اتباع وژلي دي او په سمدستي توګه یې د دې پیښې په هکله د پلټنو غوښتنه کړې.
د پاکستان د بهرنیو چارو د وزارت ویاندې ممتاز زهرا بلوچ په خبري کنفرانس کې دا یوه "تروریستي پیښه" وبلله او د ایراني چارواکو څخه یې وغوښتل چې عاملینو ته یې سزا ورکړي.
میرمن بلوچ زیاته کړه، "دا یوه وحشتناکه او د کرکې وړ پیښه ده. مونږ یې په ښکاره توګه غندو".
د ایران رسمي خبري اژانس مهر د عیني شاهدانو له قوله خبر ورکړی، چې نامعلومو وسله والو نن د شنبې په سهار د سراوان ښار په سرکین سیمه کې په یو کور کې نهه تنه "غیر ایراني" اتباع وژلي دي.
په راپور کې دا نه و ویل شوي کسان د پاکستان اتباع دي.
د پاکستان د بهرنیو چارو وزارت دې ویاندې زیاته کړه، " مونږ د ایراني چارواکو سره په اړیکه کې یو او د پیښې په هکله مو په سمدستي توګه د پلټنو غوښتنه کړې او هغو کسانو سره د حساب کولو غوښتنه کړې چې پدې ناوړه جنایت کې لاس لري".
تر اوسه هیڅ کومې ډلې یا فرد په ایران کې ددې پاکستاني اتباعو د وژلو ادعا نده کړې. په مطبوعاتو کې ویل شوي چې دې پاکستاني اتباعو د ایران پولې سره نږدې د موټرو جوړولو په یو دکان کې کار کاوه.
میرمن بلوچ همدارنګه وویل چې جګپوړي پاکستاني چارواکي هغه روغتون ته روان دي چې ګڼ شمیر ټپي شوي کسان پکې د درملنې لپاره وړل شویدي او دا ژمنه یې هم وکړله چې پدې پیښې کې د وژل شویو مړي به په سمدستي توګه هیواد ته راوړل شي.
د پاکستان د بهرنیو چارو د وزارت ویاندې زیاته کړه چې دا ډول "بزدلانه بریدونه" به د ترهګرۍ سره په جګړې کې د دې هیواد اراده کمزورې نه کاندي.
په ایران کې دا پاکستاني اتباع داسې مهال وژل کیږي چې د پاکستان پوځ څه باندې یوه اوونۍ وړاندې په ایران کې دننه څو ځایونه چې ګمان کیده د وسله والو د پټیدو مرکزونه دي وروسته تر هغه وویشتل چې تر هغې وړاندې ایران په پاکستان کې دننه دیته ورته بریدونه کړي و.
ایراني چارواکو ویلي د پاکستان په بریدونو کې چې د سراوان په سیمې کې شوي و نهه تنه وژل شوي و چې اکثریت یې میرمنې او ماشومان و.
خو اسلام آباد بیا ادعا لري چې پوځ د بلوچ بیلتون غوښتونکو مرکزونه ویشتې چې د ایران په سرحدي سیمو کې پټ دي او له هماغه ځایه پدې هیواد کې د بریدونو بندوبست کوي.
فورم \ دبحث خونه