په کندز کې د پولیو واکسین په تیر فرعي کمپاین کې ۳۶۰ زره ماشومان هدف ټاکل شوی و چې له دغې جملې یوازې ۱۷۵زره ماشومانو ته د پولیو څاڅکي رسیدلي.
د کندز د کتلوي معافیت مسؤل ډاکټر غلام جیلاني عطايي، امریکا غږ ته وویل، چې په کلیوالو سیمو کې د پولیو کور په کور کمپاین ته اجازه نه ورکول کیږي بلکه کلینک په کلینک کمپاین مخکې ځي، نو ځکه دوی د ټاکلي هدف په کچه ماشومان نه دي واکسین کړي.
ښاغلي عطايي وویل: "مونږ د خپل هدف یوازې ۴۹ سلنه (۱۷۵زره) ماشومانو ته واکیسن رسولی دی، او لوی عامل یې هم د نا امنۍ له امله د پولیو د کور په کور کمپاین نه تطبیقیدل دي."
دا پداسې حال کې دی چې یوه اونۍ وړاندې په کندز کې د پولیو واکسین درې ورځنی فرعي کمپاین پیل شو، خو هغه کورنۍ چې د طالبانو تر واک لاندې سیمو کې ژوند کوي ماشومان یې له واکسین پاتې دي.
د خان آباد ولسوالۍ یو تن اوسیدونکي جاوید امریکا غږ ته وویل: "زمونږ سیمه له ښاره وتلې ده او امنیتي ستونزې لري، نو ځکه مې ماشومانو ته واکسین نه دی کړی. له مسؤلینو مو دا غوښتنه ده چې زمونږ سیمې او د کورونو شا ته راشي او ماشومان مو له ګوزڼ څخه وژغوري."
خو بیا د کندز د ښاري سیمې یو اوسیدونکۍ نعمت الله وايي: "د پولیو د کمپاین د پیل سره سم مي خپلو ټولو ماشومانو ته د پولیو دوه څاڅکي واکسین تطبیق کړ ترڅو د ګوزڼ له ناروغۍ خوندي پاتې شي."
د پولیو پنځه ورځنی کمپاین د سپتمبر په ۱۴ (وږي ۲۴) په ۲۰ ولایتونو کې پیل او ټاکل شوی و چې په دغه کمپاین کې به له پنځو کلونو ټیټ عمر لرونکي ۱.۶ میلیون ماشومان واکسین شي.
د روان میلادي کال له پیل راهیسې تر اوسه په ټول افغانستان کې د پولیو ۴۷ پیښې ثبت شوي چې ورځ په ورځ په زیاتیدو دي.
