د ننګرهار روغتیایي چارواکي وایي چې په دې ولایت کې سره له دې چې د پولو کمپاین په ځنډ سره پلی شو، خو بریالی ؤ او نږدې اووه لکه ماشومانو ته واکسین تطبیق شو.
د ننګرهار روغتیایي مسؤولین وایی د نومبر میاشتې کمپاین د ننګرهار په مرکز او ۲۲ ولسوالیو کې په راڼه ډول او پرته له کوم ممانعت څخه ترسره شو".
عطاالرحمن فاتح، د ننګرهار د عامې روغتیا رئيس امریکا غږ ته وویل: " د دغه کمپاین په ترڅ کې ۶۹۴۰۰۰ تنه ماشومانو ته د پولیو د واکسین څاڅکي د روغتیایي چارواکو د بشپړې څارنې لاندې تطبیق شول".
ښاغلي فاتح زیاته کړه، د رسمي لارښوونو پر بنسټ مو دا ځل د کورونو پر ځای په جوماتونو کې کمپاین ترسره کړ او پر دې وتوانیدو چې د ټاکلي هدف ۷۸ سلنه ماشومان واکسین کړو.
بل لوري ته د ننګرهار اوسیدونکي هم د پولیو ضد کمپاین له بهیر څخه خوښ ښکاري او تمه لري چې کوچنیان به یې له تل پاتې معلولیت څخه وژغورل شي.
ښاغلي وکیل، د ننګرهار ولایت یو تن اوسیدونکي په دې هکله امریکا غږ ته وویل: "ډیر خوشحاله یم چې زموږ د سیمې په ګډون په ټول ننګرهار کې ماشومانو ته د پولیو ضد واکسین وکړل شو، ځکه ګوزڼ د هغوی ژوند ګواښوي".
د جلال آباد ښار یو بل اوسیدونکی، هدایت الله بیا وایي چې موږ خپل ټول کوچنیان واکسین کړي او له ټولو هغو بنسټونو څخه چې د پولیو ناروغۍ په له منځه وړو کې مرسته کوي، منندوی یو.
وروسته له هغه چې په افغانستان کې طالبان واک ته ورسیدل، په ټول هیواد کې د پولیو ضد کمپاینونه ټکني شول.
د یادونې وړ ده چې په ننګرهار کې د کمپاینونو د ځنډیدو یو لامل پر واکسیناتورانو وسلوال برید بلل شوی.
پولیو یوه ویروسي ناروغي ده او که یې واکسین په ټاکلي وخت تطبیق نه شي، ښایي ماشومان د معلولیت له کړاوونو سره مخ کړي.
