د افغانستان نوموتی سندرغاړی او کمپوز جوړونکی، استا الفت آهنګ چې اصلي نوم یې داد محمد و، یکشنبه مارچ ۱۷ (کب ۲۷) په کاناډا کې د ورپیښې ناروغۍ له کبله د ۷۰ کالونو په عمر مړ شو.
د دغه افغان سندرغاړي مړینه د هغه زوی، قیس الفت د فیس بوک په پاڼې کې تائید کړې.
قیس الفت څو ورځې وړاندې په فیس بوک کې د خپل پلار د روغتیا لپاره د خلکو څخه د دعا غوښتنه کړې وه خو دا یې نه و ویلي چې پلار یې څه ډول ناروغي درلوده.
د افغانستان د موسیقۍ دې استاد په کلاسیکې موسیقۍ، سندرو ویلو او کمپوز په برخې کې ځانګړې وړتیا درلوده چې سلګونه سندرې یې ویلي او جوړې کړیدي.
د افغانستان د مخکني حکومت جمهور رئیس محمد اشرف غني، استاد الفت آهنګ ته په ۲۰۱۹ کال کې د افغان موسیقۍ لپاره د کړو خدماتو له کبله د میر مسجدي خان مډال هم ورکړی و.
استاد الفت آهنګ په ۱۹۵۴ کال کې په افغانستان کې زیږیدلی و خو په هیواد کې د ناخوالو له کبله یې ډیر عمر په هند او کاناډا کې په کډوالۍ کې تیر کړ.
د الف اهنګ یو شمیر مینه والو په ټولنیزو شبکې کې د هغه په مړینې خفګان ښودلی او د افغانستان د موسیقۍ لپاره یې یو ضایعه بللی.
فورم \ دبحث خونه