د امریکا د دفاع وزیر جیم متیس د سوریې په کورنۍ جګړه کې د روسیې پر رول سخته نیوکه کړې ده.
متیس د سه شنبې په ورځ (اګست ۲۸) په واشنګټن کې خبریالانو ته وویل چې د بشارالاسد له رژیم څخه د مسکو د دوامدار ملاتړ له وجې په سوریه کې روانه جګړه اوږده شوې ده.
د سوریې له کورنۍ جګړې اوه کاله تېر شول خو د ختمېدو څرکې يې نه شته.
متېس وایې چې د امریکا هدف دادی "د سوریې کورنۍ جګړه د ژنیف بهیر ته سیخ کړو څو د سوریې خلک یو نوی حکومت جوړ کړی چې مشر یې اسد نه وي."
د ژنیف د سولې بهیر تراوسه د سولې په راوستلو او د نوي حکومت د جوړولو په کار کې ناکام دی.
که له یوې خوا د سوریې په لویدیځ کې یاغیان د روسیې او ایران له ملاتړ څخه د برخوردارو سوریايي پوځیانو پر ضد جګړه کوي، له بلې خوا متحده ایالتونه د هېواد په ختیځ کې له هغو محلي وسله والو څخه ملاتړ کوي چې د داعش پر ضد مبارزه کوي.
که څه هم چې داعش اوس د سوریې په ډیرو محدودو سیمو کې حضور لري خو د امریکا ولسمشر ډونالډ ټرمپ د روان کال په پیل کې وویل چې حکومت یې د سوریې له خاورې څه د امریکايي پوځیانو پر ویستلو "جدي فکر" کوي.
د امریکا د دفاع وزیر وایې چې په سوریه کې یې د پوځیانو ماموریت ختم شوی نه دی بلکه امریکایان باید د محلي پوځیانو روزلو ته دوام ورکړي.