په سعودي کې د هوايي چلند یوې اکاډمئ خپلې دروازې د لمړي ځل لپاره د ښځینه زده کوونکو پر مخ پرانیستلې.
“دلال یشار” چې تازه یې د تجارتي پیلوټی زده کړې لپاره نوم لیکنه وکړه، د نوم لیکنې هغه مرکز مخکې ولاړه ده چې راتلونکي کې به د شاه فهد نړیوال هوايي ډګر لپاره تجارتي پیلوټان وروزي.
د آکسفورډ هوايي چلند اکاډمي چې د پیلوټانو په روزنه کې ډېر نوم لري، تر دې مهاله یې د دمام په ښار کې د سپټمبر په میاشت کې د پېلېدونکي روزنیز پروګرام لپاره د سلګونو نجونو درخواستونه تر لاسه کړي.
“دلال یشار” ددغې اکاډمې په اړه داسې وایي” مخکې به خلک د هوايي چلند د زده کړې لپاره بهرنيو هیوادونو ته تلل، د ښځو لپاره به دغه کار د سړیو په پرتله ډېر جنجالي وو.”
هغې زیاته کړه “مونږ نور په یو داسې وخت کې نه اوسیږو چې ښځې یواځې په یو څو برخو کې د کار کولو اجازه ولري. اوس د مونږ لپاره ټولې لارې خلاصې دي. که د څه کولو اراده لرئ نو کولی یې شئ.”
دغه اکاډمي د ۳۰۰ ملیون ډالرو په ارزښت د هغې پروژې یوه برخه ده چې د هوایي چلند د یوې اکاډمۍ د جوړولو ترڅنګ به په هوایي ډګر کې د نړیوالو پروازونو د سمبالولو د یو مرکز جوړول هم شامل وي.
زده کوونکو ته به د درې کلونو لپاره، اکاډمیکه او عملي روزنه ورکړل شي.
په سعودي کې د ښځو په موټر چلولولس کلن بندیز چې نورې نړۍ ورته په دغه هیواد کې د ښخو په وړاندې د تاوریخوالي او اسارت د سمبول په سترګه کتل، اوس د ځوان خلیفه محمد بن سلمان لخوا له منځه یوړل شو. دا او دې ته ورته نورو دغسې ریفورمونو د سعودي په اقتصادي حالت کې ډېر تغیر راووست او د دې هیواد تړلې دروازې یې د نورې نړې پر مخ پرانیستلې.
د سعودي عربستان غربي متحدینو د دغه بندیز له لرې کولو هرکلی کړئ او دا یې په سعودي کې د پرمختګ یوه ښه نمونه بللې خو له بلې خوا هغه کسان چې د دغه بدلون څخه ناراضي دي، د حکومت لخوا ځپل کیږي.
