اروپایي اتحادیې په یوې اعلامیې چې یکشنبه نومبر ۲۸ ناوخته خپره شوې، ویلي چې په دوحه کې د طالبانو جګپوړو چارواکو د هوایي ډګرونو په فعال ساتلو کې د همکارۍ غوښتنه کړې.
په اعلامیې کې ویل شوي چې طالبانو په افغانستان کې د بشري وضعیت په هکله هم "جدي اندیښنه" څرګنده کړې.
د اروپایي اتحادیې د بهرنۍ پالیسۍ د خدماتو څانګې په اعلامیې کې ویل شوي چې د طالبانو سره مذاکرات د هغوي د موقتي حکومت په رسمیت پیژندلو معنی نلري خو زیاتوي چې دا کار د اروپا او افغان ولس د ګټې په خاطر کیږي.
په خبرو کې د طالبانو د هیأت مشري د بهرنیو چارو سرپرست وزیر امیر خان متقي کوله. د طالبانو د حکومت د کورنیو چارو، پوهنې او روغتیا سرپرست وزیرانو تر څنګ د مرکزي بانک سرپرست مشر او د بهرنیو چارو، مالیې، کورنیو چارو او استخباراتو د ریاست چارواکو هم برخه درلوده.
د اروپایې اتحادیې د هیأت مشري بیا د افغانستان لپاره د دې اتحادیې ځانګړي استازي ټامس نیکلاسن کوله. د اروپایي کمیسیون د بشري مرستو، نړیوالې همکارۍ او مهاجرت د چارو استازو هم په خبرو اترو کې برخه درلوده.
په اعلامیې کې ویل شوي چې طالبانو ویلي چې د "عمومي عفوې" په هکله خپلو ژمنو ته ژمن دي او هم یې ویلي چې هغو افغانانو او بهرنیانو ته چې غواړي افغانستان پریږدي، د وتلو اجازه ورکوي خو ددغه کار کیدو لپاره یې د هوایي ډګرونو په فعال ساتلو ټینګار کړی او د اروپایي اتحادیې نه یې د مرستې غوښتنه کړې ده. طالبانو ددغې بیانیې په اړه تراوسه څه نه دي ویلي.
په اعلامیې کې همدارنګه ویل شوي چې اروپایي اتحادیې د "ټولشموله حکومت جوړیدو، دیموکراسۍ ملاتړ، نجونو ته د تعلیم د لاسرسي او افغانستان دیته نه پریښول چې د هغو ډلو په اډې بدل شي چېد نورو د امنیت ترې وګواښل شي په طالبانو فشار اچولی.
په اعلامیې کې همدرانګه ویل شوي که طالبان د اروپایي اتحادیې شرطونه ومني، د افغانستان د نوي حکومت سره لا ډیرې مالي مراستې وشي چې خیر به یې په مستقیمه توګه افغان ولس ته ورسیږي.
د امریکا - طالبانو خبرې
طالبانو په قطر کې د اروپایي اتحادیې د چارواکو سره د خبرو لپاره جګپوړي غړي لیږلي او ټاکل شوې چې نن دوشبه به طالب چارواکي د امریکايي استازو سره هم خبرې پیل کړي چې دوه ورځې به ادامه ولري.
د امریکا د بهرنیو چارو وزارت ویاند نډ پرایس د سه شنبې په ورځ نومبر ۲۳ (لیندۍ ۲) ویلي و چې د دوو اوونیو ددغو خبرو لپاره د امریکایي هئیت مشري د افغانستان لپاره د امریکا ځانګړی استازی ټوماس وست کوي.
د افغانستان لپاره امریکا ځانګړي استازي ټوماس وست د جمعې په ورځ نومبر ۱۹ طالبانو ته د امریکا د مالي او دیپلوماتیک ملاتړ د ترلاسه کیدو لپاره د متحده ایالتونو شرایط تکرار کړل.
له ترهګرۍ سره مبارزه، د همه شموله حکومت رامنځ ته کول، د اقلیتونو، میرمنو او نجونو حقونو ته درناوی او تعلیم او کار ته برابر لاسرسی طالبانو ته د امریکا مهم شرطونه ګڼل کیږي.